Përleshje mes dy shqiptarëve në Gjermani, njëri plagoset rëndë, tjetri arrestohet!

Ngjarja ka ndodhur të martën, më 20 tetor, rreth orës 20:45, në lagjen Pasing të Mynihut, ku 39-vjeçari, me vendbanim në rrethin Dachau, kishte shkuar në adresën e banimit të 34-vjeçarit. Sipas policisë gjermane, mes dy shqiptarëve ka shpërthyer një konflikt fizik jashtë ndërtesës, gjatë të cilit 39-vjeçari ka pësuar plagë të rënda në pjesën e sipërme të trupit, të shkaktuara nga një mjet i mprehtë.

Pavarësisht plagëve të rënda, i dëmtuari ka arritur ta telefonojë vetë policinë dhe të kërkojë ndihmë.Në vendngjarje kanë ndërhyrë disa patrulla policore, ndërsa 34-vjeçari, i cili pas përleshjes ishte kthyer në banesën e tij, është arrestuar pak më vonë pa bërë rezistencë.I plagosuri është transportuar me urgjencë në spital, ku i është nënshtruar një ndërhyrjeje kirurgjikale gjatë natës. Sipas autoriteteve, gjendja e tij është stabilizuar dhe nuk ndodhet më në rrezik për jetën.

Gjatë kontrollit në banesën e të dyshuarit, policia ka sekuestruar një thikë, e cila po ekzaminohet për të përcaktuar nëse është përdorur gjatë sulmit.Sipas mediave gjermane, dy shqiptarët njiheshin sipërfaqësisht me njëri-tjetrin, ndërsa shkaqet e konfliktit ende nuk janë sqaruar plotësisht.I dyshuari është dërguar në qendrën e paraburgimit, ndërsa hetimet për tentativë vrasjeje po zhvillohen nga Komisioni 11 i Policisë Kriminale të Mynihut, i specializuar për hetimin e krimeve të rënda kundër jetës.

/urgjent