Hoxha me mesazh për policët shqiptarë: Mos e vrit vëllanë tënd për lekë !

Hoxha nga Saraji, Zekirija Bajrami, ka publikuar një mesazh drejtuar policëve shqiptarë, duke u bërë thirrje që të kenë frikë Allahun dhe të mendojnë për të ardhmen e tyre dhe të familjeve të tyre.

Në reagimin e tij, Bajrami u bën thirrje policëve shqiptarë që, sipas tij, të mos e ngrenë dorën kundër vëllezërve të tyre për përfitime financiare. Ai përmend shumën prej 2.500 eurosh, për të cilën pretendon se u ofrohet nga Edi Rama, duke e cilësuar atë si helm për të ardhmen e tyre.

“Polic i dashur shqiptar, ke frikë Allahun dhe ki parasysh ardhmërinë tënde dhe të familjes sate, mos vra vëllanë tënd për lekë”, shkruan Bajrami.
Ai gjithashtu u bën thirrje policëve shqiptarë që të tregojnë burrëri dhe t’u bashkohen, siç shprehet ai, vëllezërve që sakrifikojnë dhe rrezikojnë jetën për atdheun.

Në fund të mesazhit, Bajrami shpreh qëndrimin e tij me një thirrje të drejtpërdrejtë kundër tradhtisë dhe me lutje për popullin shqiptar dhe Shqipërinë.
“Zoti i mallkoftë tradhtarët. Zoti i ruajtë shqiptarët, Zoti e bekoftë Shqipërinë!”, përfundon mesazhi i hoxhës nga Saraji.

/ts