Nuk e paguan qiranë e banesës ! Cifti shqiptar përballet penalisht në Zvicër ?

Një çift shqiptar, i përfshirë në veprimtari biznesore në sektorin e patundshmërive në Zvicër, po përballet me një procedurë penale pas disa kallëzimeve të paraqitura në kantone të ndryshme të vendit. Rasti është raportuar të shtunën, më 17 tetor 2026, nga gazeta zvicerane Blick, e cila ka publikuar hollësi për një konflikt të ri financiar ndërmjet çiftit dhe një pensionisteje 80-vjeçare.Bëhet fjalë për B. F. (35) dhe L. F. (39), të cilët dyshohen se kanë lënë pa paguar mijëra franga qira për një banesë në Stallikon, në kantonin e Cyrihut.Sipas raportimit, pensionistja E. T. (80) ua kishte dhënë banesën me qira në verën e vitit 2025.

Ajo ka treguar se çifti kishte lënë fillimisht përshtypje pozitive, duke u paraqitur me dokumentacion për të ardhurat dhe gjendjen financiare.Megjithatë, problemet me pagesat, sipas saj, kishin filluar vetëm pak ditë pas lidhjes së marrëveshjes.Pensionistja ka pretenduar se gruaja 35-vjeçare i kishte dërguar një dëshmi bankare për të vërtetuar pagesën e qirasë, por dokumenti dyshohet se ishte manipuluar.Mosmarrëveshja është thelluar më tej kur, sipas pronares, burri 39-vjeçar i kishte kërkuar 10 mijë franga për punime në kopsht, pastrim dhe largim të mbeturinave, të cilat ajo pretendon se nuk i kishte porositur.Në nëntor 2025, pensionistja kishte ndërmarrë hapa për ndërprerjen e kontratës së qirasë, me afat largimi në fund të marsit 2026.

Çifti e kishte kundërshtuar vendimin, ndërsa çështja kishte përfunduar në gjykatë.Një gjykatë në Cyrih kishte konstatuar se ndërprerja e kontratës ishte e ligjshme, por palët më pas kishin arritur marrëveshje për vazhdimin e përkohshëm të qirasë, me kusht që pagesat të kryheshin plotësisht.Sipas Blick, mosmarrëveshjet për pagesat vazhduan dhe pronarja kërkoi përsëri lirimin e banesës.

Çifti përfundimisht u largua në fund të korrikut 2026.Pensionistja pretendon se ka mbetur me 23 mijë franga qira të papaguara dhe 14 mijë franga shpenzime për avokat, duke e çuar barrën e pretenduar financiare në 37 mijë franga.Rasti lidhet edhe me raportime të mëhershme të gazetës Blick, sipas të cilave çifti ishte përfshirë në transaksione të dyshimta me banesa që nuk ekzistonin.

Në korrik 2026, gazeta kishte raportuar për persona që pretendonin se kishin humbur dhjetëra mijëra franga nga këto marrëveshje.Sipas hulumtimit të medias zvicerane, ndaj çiftit aktualisht po zhvillohet procedurë penale e bazuar në disa kallëzime nga kantone të ndryshme.Megjithatë, B. F. dhe L. F. i kanë kundërshtuar akuzat.

Në përgjigjen e tyre me shkrim për Blick, ata kanë mohuar se i detyrohen pronares shumën prej 23 mijë frangash, duke pretenduar se banesa kishte pasur probleme që nga fillimi i marrëdhënies së qirasë.Sa i përket dokumentit të kontestuar të pagesës, çifti ka deklaruar se imazhi i paraqitur nuk ishte dokumenti origjinal bankar, por nuk e ka pranuar cilësimin e tij si falsifikim. Ata kanë mohuar gjithashtu pretendimet për dorëzimin e një dëshmie të falsifikuar të pagës.Rasti vazhdon të jetë objekt i procedurave ligjore, ndërsa pretendimet penale ndaj çiftit nuk përbëjnë konstatim të fajësisë.

/Urgjent