Shmk “Drita” në Kërçovë shënon 35-vjetorin e themelimit

Me një program festiv, ekspozitë dhe pjesëmarrjen e veteranëve të arsimit, SHMK “Drita” në Kërçovë shënoi 35-vjetorin e themelimit, duke nderuar kontributin e kësaj shkolle në edukimin dhe formimin e brezave të rinj.

Sot, në ambientet e gjimnazit “Drita” në Kërçovë, u shënua 35-vjetori i themelimit të kësaj shkolle të mesme, në një atmosferë festive dhe përkujtimore.
Programi solemn u hap me intonimin e himnit kombëtar, të interpretuar nga kori i shkollës nën drejtimin e profesorit Blerim Lutfiut.

Më pas, fjalën përshëndetëse e mbajti drejtoresha e shkollës, Syarta Spahiu, e cila falënderoi kolektivin arsimor, nxënësit dhe të gjithë të pranishmit për pjesëmarrjen. Ajo shprehu mirënjohje të veçantë për veteranët e arsimit, të cilët ndër vite kanë dhënë kontribut të çmuar në zhvillimin e gjimnazit “Drita”.

Në kuadër të këtij aktiviteti, kryetari i sindikatës, Baftir Limani, ndau mirënjohje për profesorin Ismet Fejzën, i cili ka dalë në pension, në shenjë vlerësimi për kontributin e tij në fushën e arsimit.

Programi vazhdoi me pika të ndryshme artistike të përgatitura nga nxënësit, ndërsa një ekspozitë e veçantë plotësoi aktivitetin festiv, duke i dhënë ceremonisë një dimension kulturor dhe artistik.

Në përfundim të ceremonisë, të pranishmit u ftuan në një koktej rasti, ku patën mundësinë të bashkëbisedojnë dhe të ndajnë kujtime nga rrugëtimi 35-vjeçar i shkollës.

35 vjet pas themelimit, SHM “Drita” në Kërçovë mbetet një pjesë e rëndësishme e historisë arsimore të qytetit, duke kontribuar në edukimin dhe formimin e shumë gjeneratave të të rinjve.

/tvgurra