Europa paralajmëron pritje të gjata në kufijtë !

Bashkimi Evropian ka paralajmëruar shtetet anëtare që të përgatiten për fluksin e madh të udhëtarëve gjatë festave të Krishtlindjeve dhe Vitit të Ri, në mënyrë që sistemi i ri elektronik i hyrjeve dhe daljeve, i njohur si EES, të mos shkaktojë vonesa të mëdha në kufijtë e jashtëm të zonës Shengen.

Komisioneri Evropian për Punët e Brendshme dhe Migracionin, Magnus Brunner, ka kërkuar nga autoritetet kombëtare dhe aeroportet që të sigurojnë funksionimin e pandërprerë të sistemit, duke theksuar se vendet anëtare kanë pasur kohë të mjaftueshme për përgatitje.“Shtetet anëtare kishin kohë të mjaftueshme për t’u përgatitur për këtë sistem. Ata e pranuan vetë. Është një çështje sigurie dhe sistemi duhet të funksionojë”, ka deklaruar Brunner.

Sistemi EES ka ndryshuar mënyrën e regjistrimit të qytetarëve të vendeve jashtë Bashkimit Evropian gjatë kalimit të kufijve të jashtëm të Shengenit.Në vend të vulosjes tradicionale të pasaportave, sistemi regjistron në mënyrë elektronike hyrjet dhe daljet, duke përfshirë fotografinë e fytyrës dhe gjurmët e gishtërinjve për udhëtarët që i nënshtrohen kësaj procedure.Pritje deri në pesë orë në aeroportin e BrukselitZbatimi i sistemit ka sjellë vështirësi në disa aeroporte evropiane, ku janë regjistruar radhë të gjata gjatë kontrolleve kufitare.Sipas raportimeve nga Belgjika, në aeroportin Zaventem të Brukselit pasagjerët kanë pritur në disa raste deri në pesë orë për përfundimin e procedurave të kontrollit.

Autoritetet belge kanë bërë të ditur se aeroporti ka kapacitet të përpunojë rreth 500 deri në 600 pasagjerë që mbërrijnë nga jashtë zonës Shengen brenda një ore, ndërsa gjatë periudhave më të ngarkuara numri i udhëtarëve mund të arrijë deri në 3.500.Ministri i Brendshëm belg, Bernard Quintin, ka theksuar se sfida kryesore lidhet me kapacitetet infrastrukturore të aeroportit.Për të zvogëluar vonesat, autoritetet po testojnë korridore shtesë automatike, pajisje për regjistrimin paraprak të udhëtarëve dhe po trajnojnë personel shtesë.Çfarë do të thotë kjo për kosovarët?Sistemi EES zbatohet edhe për shtetasit e Kosovës që udhëtojnë për qëndrime afatshkurtra në zonën Shengen dhe nuk përjashtohen nga ky sistem për shkak të statusit të tyre të qëndrimit.

Kjo është veçanërisht e rëndësishme për qytetarët që udhëtojnë nga Kosova drejt vendeve të Bashkimit Evropian ose kthehen nga diaspora gjatë festave të fundvitit.Gjatë kalimit të kufirit të jashtëm të Shengenit, udhëtarëve mund t’u kërkohet regjistrimi biometrik, ndërsa në udhëtimet pasuese të dhënat verifikohen përmes sistemit elektronik.Për shkak të fluksit të madh gjatë dhjetorit, ekziston mundësia e pritjeve më të gjata në aeroporte dhe pika kufitare tokësore, veçanërisht aty ku infrastruktura nuk është përshtatur plotësisht me procedurat e reja.

Rreth 80 mijë personave u është refuzuar hyrjaPavarësisht vështirësive, Komisioni Evropian vlerëson se sistemi EES ka sjellë rezultate në forcimin e sigurisë kufitare.Sipas shifrave të paraqitura nga komisioneri Brunner, sistemi ka regjistruar pothuajse 230 milionë hyrje dhe dalje në rreth 1.500 pika kufitare.Rreth 80 mijë personave u është refuzuar hyrja, ndërsa afërsisht 2 mijë udhëtarë janë identifikuar si kërcënime të mundshme për sigurinë, për shkak të lidhjeve të dyshuara me terrorizmin apo krimin e organizuar.

Komisioni Evropian ka ofruar mbështetje shtesë financiare dhe mundësinë e angazhimit të agjencisë evropiane të kufijve, Frontex, për të ndihmuar shtetet që përballen me vështirësi.Festat e ardhshme të fundvitit pritet të jenë një provë e rëndësishme për funksionimin e sistemit EES, ndërsa autoritetet evropiane synojnë të shmangin përsëritjen e pritjeve shumëorëshe në kufij. /Urgjent