Autostrada Bukojçan–Kërçovë pritet të përfundojë për katër vjet ? (VIDEO)

Sot zyrtarisht nisën punimet për ndërtimin e autostradës Bukojçan–Kërçovë, pjesë e Korridorit 8, e cila pritet të lidhë autostradat Kërçovë–Ohër dhe Tetovë–Gostivar–Bukojçan.
Segmenti do të jetë i gjatë 11,5 kilometra, me nga dy korsi trafiku dhe një korsi ndalimi në secilin drejtim. Shpejtësia e projektuar e lëvizjes do të jetë nga 110 deri në 130 kilometra në orë. Në trasenë e autostradës janë paraparë pesë ura, një tunel, dy viadukte dhe dy kryqëzime rrugore, ndërsa afati për përfundimin e punimeve është katër vjet.

Për realizimin e projektit janë siguruar 119 milionë euro nga Banka Evropiane për Rindërtim dhe Zhvillim, një grant prej 20 milionë eurosh nga Bashkimi Evropian dhe 300 mijë euro shtesë përmes Fondit të Bashkimit Evropian për Ballkanin Perëndimor.
Në ceremoninë e fillimit të punimeve foli kryeministri Hristijan Mickoski, i cili theksoi se me këtë segment përmbyllet lidhja e Shkupit dhe Ohrit me autostradë.

Ai tha se Qeveria synon që Maqedonia të zhvillohet si kryqëzim i dy korridoreve pan-evropiane, Korridorit 8 dhe Korridorit 10, përmes investimeve në infrastrukturën rrugore, hekurudhore, energjetike dhe të gazit.

Zëvendëskryeministri dhe ministri i Transportit, Aleksandar Nikolloski, shprehu pritshmërinë që kompanitë përgjegjëse për mbikëqyrjen dhe ndërtimin ta përfundojnë punën brenda afatit të paraparë.

Nga ana tjetër, drejtori i Ndërmarrjes Publike për Rrugët Shtetërore, Koce Trajanovski njoftoi se autostrada do të jetë pa pagesë dhe shprehu pritshmërinë se, pas përfundimit të projekteve infrastrukturore, udhëtimi nga Shkupi në Ohër do të zgjasë më pak se një orë e gjysmë.

VIDEO:

 

/tv21