Tragjedi si historia e “Hasan Agës”: Dy të rinj vetëvriten brenda pak orësh !
Dy ngjarje të rënda kanë tronditur brenda dy ditësh fshatin Boriç i Madh në Malësinë e Madhe, ku një 28-vjeçar dhe një 19-vjeçare dyshohet se i kanë dhënë fund jetës. Më 6 tetor, rreth orës 15:20, 28-vjeçari me inicialet K.P., banues në Boriç i Madh, u gjet i pajetë në një zonë bujqësore të fshatit. Sipas Policisë, nga veprimet e para hetimore dyshohet se i riu ka humbur jetën si pasojë e vetëvrasjes. Grupi hetimor vijon verifikimet për të përcaktuar rrethanat e plota të ngjarjes.
Vetëm një ditë më vonë, më 7 tetor, një tjetër ngjarje e rëndë u shënua në Boriçin e Madh. 19-vjeçarja me inicialet D.Gj. u gjet e pajetë, ndërsa sipas Policisë dyshohet se edhe ajo i ka dhënë fund jetës. Autoritetet kanë nisur hetimet për të zbardhur rrethanat dhe shkaqet që çuan në ngjarjen e rëndë.
Por, përtej dy rasteve të rënda, në redaksinë e JOQ Albania kanë mbërritur dëshmi nga banorë të zonës që ngrenë pikëpyetje mbi një lidhje të mundshme mes dy ngjarjeve.
Sipas këtyre dëshmive, të pakonfirmuara zyrtarisht, dy të rinjtë kanë qenë në një lidhje. Banorët pretendojnë gjithashtu se 19-vjeçarja ishte fejuar nga familjarët e saj pa dëshirën e saj dhe se ngjarja e parë ka ndodhur në të njëjtën ditë kur ajo është fejuar.
Këto janë pretendime të banorëve dhe deri tani nuk janë konfirmuar nga Policia apo ndonjë organ tjetër hetimor. Nuk dihet nëse mes dy rasteve ekziston realisht ndonjë lidhje dhe nëse pretendimet për fejesën pa dëshirë qëndrojnë.
Pikërisht për këtë arsye, dy ngjarjet kërkojnë një hetim të plotë dhe sqarim publik nga institucionet kompetente. Nëse pretendimet e banorëve rezultojnë të vërteta, atëherë rrethanat që i kanë paraprirë dy rasteve do të merrnin një dimension edhe më të rëndë.
JOQ Albania u bën thirrje Policisë së Shtetit dhe organeve të drejtësisë që të sqarojnë nëse ka pasur një lidhje mes dy të rinjve, nëse ka pasur presion familjar apo ndonjë rrethanë tjetër të rëndësishme dhe nëse këto elemente kanë ndikuar në dy ngjarjet. Deri në përfundimin e hetimeve, çdo pretendim duhet trajtuar me rezervë dhe jo si fakt të provuar.
/ts
