Këshilltarët shqiptarë kërkojnë përgjegjësi institucionale për rastin e flamurit !

Në mbledhjen e sotme të Këshillit Komunal të Kërçovës, në rend dite ishte edhe kërkesa për sqarim dhe përgjegjësi lidhur me rastin e flamurit në hapësirat e NP „Komunalec“.

Shtatë këshilltarë shqiptarë, nga radhët e AKI-së dhe të pavarurit, kërkuan përgjegjësi institucionale dhe ndërmorën iniciativë për shkarkimin e drejtorit të ndërmarrjes.

Ata kërkuan gjithashtu bashkimin e këshilltarëve shqiptarë dhe një qëndrim të përbashkët institucional për rastin.
Në shenjë pakënaqësie me mënyrën e trajtimit të çështjes, këshilltarët e AKI-së dhe të pavarurit e lëshuan seancën, duke kërkuar që këshilltarët shqiptarë të bashkohen dhe të kërkojnë përgjegjësi institucionale.

Iniciativës nuk iu bashkuan këshilltarët e VLEN-it, ndërsa nuk e mbështeti as kryesuesi i Këshillit Komunal, Ajhan Sulkovski, i cili vjen nga krahu politik i Fatmir Limanit.

Rasti i flamurit ka shkaktuar reagime publike gjatë ditëve të fundit dhe tashmë është bërë pjesë e debatit në Këshillin Komunal të Kërçovës.

/tvgurra