Mickoski: Maqedonia ka rritje ekonomike tri herë më të madhe se Europa ?

Kryeministri i Maqedonisë së Veriut, Hristijan Mickoski, ka deklaruar se ekonomia e vendit gjatë periudhës së fundit ka shënuar rritje më të lartë krahasuar me Bashkimin Evropian, duke theksuar se investimet në teknologji dhe qendrat e të dhënave mund të hapin mundësi të reja për eksport, raporton Tetovasot.

Duke folur në prezantimin e raportit të ri të Bankës Botërore “Maqedonia: Dalja nga kurthi i të ardhurave të mesme”, Mickoski tha se gjatë 27 muajve të qeverisjes së tij rritja mesatare reale ekonomike ka qenë mbi 3.5 për qind, ndërsa në BE dhe eurozonë, sipas tij, është rreth 1 deri në 1.2 për qind.

“Ky është rreth tre herë më shumë krahasuar me rritjen mesatare te partneri ynë më i madh tregtar, Bashkimi Evropian”, deklaroi Mickoski.

Ai u ndal edhe te të dhënat për tregtinë e jashtme, duke thënë se gjatë muajve të fundit eksporti është rritur me 11.5 për qind, ndërsa importi me 8.5 për qind.

Kryeministri foli edhe për situatën energjetike dhe inflacionin, duke theksuar se, sipas tij, vendi ka arritur të mbajë stabilitet të çmimeve të energjisë dhe inflacion më të ulët krahasuar me mesataren evropiane.

Një pjesë të rëndësishme të fjalimit Mickoski ia kushtoi zhvillimit të teknologjisë së avancuar dhe ndërtimit të qendrave të të dhënave.

Sipas tij, në këtë drejtim tashmë ka interes nga pesë deri në gjashtë investitorë seriozë, ndërsa nëse realizohen disa prej këtyre projekteve, Maqedonia e Veriut mund të arrijë eksport të shërbimeve me vlerë prej qindra milionë dollarësh ose eurosh.

“Inteligjenca artificiale dhe qendrat e të dhënave nuk janë më industri e së ardhmes, por industri e së tashmes. Ky është një proces i pakthyeshëm dhe ne duhet ta shfrytëzojmë këtë mundësi”, tha Mickoski.

Ai bëri të ditur se Qeveria po punon edhe në ndryshime ligjore për të krijuar kushte për këto investime.

Në fjalimin e tij, kryeministri foli edhe për reformat në sistemin social, duke deklaruar se gjatë kontrolleve janë zbuluar rreth 4.500 përfitues fiktivë të ndihmës minimale të garantuar.

Sipas tij, nga verifikimet është konstatuar se në listat e përfituesve kishte persona të vdekur, të shpërngulur ose persona që nuk ekzistonin, duke shkaktuar shpenzime të panevojshme nga buxheti i shtetit.

Mickoski theksoi se kursimet nga këto reforma mund të drejtohen drejt investimeve kapitale, infrastrukturës, energjetikës dhe projekteve zhvillimore.

Në fund, kryeministri përmendi edhe projektet infrastrukturore që janë në realizim, përfshirë rrugët ekspres, autostradat, hekurudhat, gazifikimin dhe projektet energjetike, të cilat sipas tij do të forcojnë pozitën strategjike të vendit.

/ts