Gjermani: 54-vjeçari nga Kosova gjykohet për gjashtë vjedhje ?

I akuzuari, i cili përdorte pseudonimin “Peter Ziege”, ka pranuar katër nga rastet që i ngarkohen, ndërsa dy të tjera vazhdon t’i mohojë. Sipas të dhënave të paraqitura gjatë procesit, ai kishte përdorur dokumente të ndryshme gjatë udhëtimeve në Evropë, herë pasaportën serbe dhe herë atë të Kosovës.

Autoritetet gjermane kishin arritur ta identifikonin edhe falë të dhënave nga Bavaria. Në korrik të vitit 2025, Gjykata e Landshut-it e kishte dënuar me katër vjet e tetë muaj burg për vjedhje të rëndë në grup. Këtë dënim ai aktualisht po e vuan në burgun Stadelheim të Mynihut, prej nga transportohet në Münster për seancat e gjykimit.

Për katër akuzat e para, 54-vjeçari ka dhënë një rrëfim të plotë. Ai ka deklaruar se kishte vepruar i vetëm dhe se shtëpitë i zgjidhte rastësisht, kryesisht kur vërente se brenda nuk kishte drita të ndezura. Në një rast në Ascheberg, sipas aktakuzës dhe të dhënave të paraqitura në gjykatë, ishin marrë para, bizhuteri, rroba dhe parfume me vlerë mbi 8 mijë euro, ndërsa dëmi i përgjithshëm material ishte rreth 10 mijë euro.

Në Drensteinfurt, sipas të njëjtave të dhëna, ai kishte synuar tri shtëpi pranë njëra-tjetrës. Në të parën ishte tërhequr pasi ishte trembur nga lehja e një qeni, në të dytën kishte hyrë por nuk kishte gjetur gjëra me vlerë, ndërsa në të tretën kishte marrë vetëm një orë dore me vlerë rreth 200 euro. Megjithatë, dëmi i shkaktuar gjatë hyrjes dhe kontrollimit të shtëpisë raportohet se ishte shumëfish më i lartë se vlera e sendit të vjedhur.

Një nga elementet që ka tërhequr vëmendjen e hetuesve ishte mënyra e veprimit pas vjedhjeve. Sipas të dhënave të procesit, i akuzuari përdorte detergjentë të lëngshëm që i gjente brenda shtëpive dhe i hidhte mbi dritaret dhe dyert e prekura, me qëllim që të zhdukte gjurmët e gishtërinjve. Megjithatë, në disa mobilie ishin gjetur njolla gjaku, nga të cilat ishte siguruar ADN-ja. Kjo gjurmë ishte krahasuar me të dhënat që policia bavareze kishte në sistem dhe kishte çuar në identifikimin e tij.Dy rastet e tjera, të ndodhura më 3 shkurt 2022 në Ascheberg, 54-vjeçari i mohon.

Në njërin prej tyre raportohet se ishin vjedhur bizhuteri me vlerë rreth 15 mijë euro. I akuzuari pretendon se në atë periudhë ndodhej me familjen në Kosovë. Hetuesit, megjithatë, dyshojnë se ai mund të ketë qenë i përfshirë edhe në këto raste për shkak të ngjashmërisë së mënyrës së veprimit, veçanërisht përdorimit të detergjentëve për pastrimin e gjurmëve. Kjo mbetet çështje që po shqyrtohet nga gjykata dhe nuk është vërtetuar përfundimisht.

Gjatë procesit kanë dëshmuar edhe viktimat e vjedhjeve, të cilat kanë përshkruar pasoja të rënda psikologjike pas hyrjeve me dhunë në shtëpitë e tyre. Disa prej tyre kanë treguar se vazhdojnë të përballen me ankth, ndërsa humbja e bizhuterive të trashëguara familjare u ka shkaktuar edhe pasoja të mëdha emocionale. Gjykimi ndaj 54-vjeçarit është planifikuar të vazhdojë deri më 15 tetor 2026.

/ms