Ky është plani i Rusisë për të mposhtur NATO-n!

Përshkallëzimi gradual mund të krijonte përçarje brenda NATO-s, duke testuar vazhdimisht kufirin mes luftës dhe paqes. Në një konflikt hibrid, objektivi i Moskës nuk do të ishte domosdoshmërisht pushtimi i menjëhershëm i territorit, por dobësimi i aleancës si një bllok i bashkuar.

Një skenar i mundshëm parashikon tensione në Baltik, ku Rusia mund të ushtronte presion ndaj Estonisë përmes bllokadave detare, grumbullimit të trupave pranë kufirit, sulmeve me dronë dhe operacioneve të tjera të “zonës gri”. Paralelisht, Moska mund të kërkonte dobësimin e pranisë së NATO-s në rajon dhe të nxiste lëvizje separatiste.

Sulmet nuk do të duhej të nisnin menjëherë me një ofensivë të madhe ushtarake. Goditje të kufizuara ndaj infrastrukturës, tubacioneve, linjave elektrike apo pikave strategjike mund të përdoren për të testuar reagimin e vendeve të NATO-s dhe për t’i bërë incidente të tilla gradualisht pjesë të realitetit të përditshëm.

Rreziku kryesor do të ishte pikërisht ky përshkallëzim hap pas hapi. Çdo incident do të ishte pak më serioz se ai i mëparshmi, ndërsa vendet e NATO-s do të përballeshin vazhdimisht me pyetjen se kur duhet të përgjigjen ushtarakisht.

Nëse aleanca do të humbiste aftësinë për të vepruar si një bllok i vetëm, Rusia mund të përpiqej të zgjeronte ndikimin e saj në Evropën Lindore pa pasur nevojë për një pushtim të menjëhershëm.

Skenari më i rrezikshëm, sipas kësaj analize, nuk është një sulm i vetëm masiv ndaj NATO-s, por një seri provokimesh të vogla që do ta testonin, lodhnin dhe përçanin aleancën. Sfida për Evropën do të ishte të kundërshtonte këtë presion pa lejuar që incidentet e kufizuara të shndërroheshin në një luftë të madhe.

/ts