Të rinjtë po e braktisin Maqedoninë ! Mbi 22 mijë banorë më pak çdo vit ?

Maqedonia e Veriut po përballet me largimin e vazhdueshëm të të rinjve për shkak të pagave të ulëta, mungesës së vendeve të punës dhe perspektivës së kufizuar. Sipas Strategjisë për Zhvillim Rajonal 2021–2031, vendi mund të humbasë deri në 22 mijë banorë çdo vit.

Të rinjtë përmendin si arsye kryesore edhe cilësinë e dobët të arsimit, mungesën e mbështetjes institucionale dhe ndjenjën se puna e tyre nuk vlerësohet. Edhe shfaqja e jetës luksoze në rrjetet sociale ndikon në dëshirën për t’u larguar.

Qeveria parashikon masa për punësim, vetëpunësim, trajnime dhe praktika profesionale. Përmes “Garancisë për të rinjtë”, personat deri në 29 vjeç duhet të marrin brenda katër muajve ofertë për punë, arsimim ose trajnim. Megjithatë, ende nuk është përcaktuar një objektiv konkret për uljen e emigrimit.

Të dhënat tregojnë një krizë të thellë demografike: në vitin 2025, 66 komuna kishin më shumë vdekje sesa lindje, ndërsa lindjet ranë me 4,1%. Deri në vitin 2055, personat mbi 65 vjeç pritet të përbëjnë mbi 34% të popullsisë dhe fuqia punëtore të zvogëlohet me afro gjysmë milioni.

Sipas OECD-së, në vitin 2024 rreth 535 mijë shtetas të Maqedonisë së Veriut jetonin jashtë vendit, ndërsa norma e emigrimit kishte arritur në 24,2%. Largimi i fuqisë së kualifikuar po bëhet problem serioz edhe për bizneset.

/lajmpress