Banorët e Balla Mëhallës i dalin përpara neglizhencës: “Po bëjmë punën e atyre që duhet të kujdesen!” (VIDEO)

Kur institucionet nuk reagojnë, qytetarët marrin vetë mjetet e punës në dorë.
Banorët e Lagjes Balla Mëhalla në Kërçovë kanë ndërmarrë sot një aksion vullnetar për pastrimin e rrethqarkullimit pranë shkollës, duke treguar edhe një herë se kujdesi për komunitetin nuk mungon te qytetarët. Me mjete pune dhe me angazhim të përbashkët, banorët pastruan hapësirën përreth rrethqarkullimit, në një zonë që frekuentohet çdo ditë nga nxënës, prindër dhe qytetarë.

Por aksioni nuk ishte vetëm një pastrim. Ishte edhe një mesazh i fortë për institucionet përgjegjëse:
“Po bëjmë punën e atyre që duhet të kujdesen, sepse ata që kanë përgjegjësi nuk po kujdesen.”
Ky grup vullnetarësh është i njohur edhe për angazhimin e tij human dhe qytetar. Edhe gjatë përmbytjeve të muajve të kaluar, anëtarët e këtij grupi u angazhuan për të ndihmuar banorët e prekur.

Sot, ata sërish dëshmuan se kur bëhet fjalë për lagjen dhe komunitetin, nuk presin vetëm nga të tjerët – por dalin vetë në terren.
Megjithatë, aksioni ngre një pyetje të thjeshtë, por të rëndësishme:
Nëse qytetarët duhet të marrin vetë fshesat, mjetet dhe të pastrojnë hapësirat publike, atëherë kush është përgjegjës për mirëmbajtjen e tyre?
Respekt për banorët që japin shembullin se komuniteti mund të bëjë shumë kur bashkohet.

VIDEO:

/tvgurra