Valbona Adili Emini: Një vit i ri shkollor nis, 1 Shtatori vjen nesër dhe bashkë me të, një kapitull i ri për fëmijët tanë.

Sot dua të veçoj në mënyrë të veçantë ata fëmijë që këtë vit ulen për herë të parë në bankat e shkollës, por që erdhën në jetë në një nga periudhat më të vështira që kemi përjetuar.
Ata lindën në kohën e Koronës…

Në një botë të mbyllur, në heshtje, në izolim dhe në frikën e madhe nga e panjohura. Në një kohë kur lajmet flisnin për sëmundje dhe vdekje, ndërsa në familjet e tyre dëgjohej një tjetër zë qarja e tyre e parë, që sillte jetë, shpresë dhe gëzim.

Ishin fëmijët që erdhën në jetë mes maskave, distancës dhe dyerve të mbyllura, por që na kujtuan se edhe në ditët më të errëta, jeta gjen gjithmonë një mënyrë për të sjellë dritë.
Sot, ata nuk janë më foshnjat e asaj kohe.

Sot mbajnë çantat në shpinë, kanë sytë plot kureshtje dhe nisin rrugëtimin e tyre të parë drejt dijes.
Uroj që rruga e tyre të jetë e gjatë, e bukur dhe e mbushur me shëndet, dije, miqësi dhe ëndrra të mëdha.

Fëmijë të lindur në kohë të vështira, por të destinuar për të jetuar kohë më të bukura.
Suksese në vitin e ri shkollor, vogëlushë!
Qofshi gjithmonë arsyeja jonë për të besuar te e ardhmja.

/ms