Sqarim dhe qëndrim zyrtar nga KF Vëllazërimi

Të nderuar kërçovarë, sportdashës të KF Vëllazërimit,
Ditëve të fundit është ngritur një temë rreth tribunës së stadiumit, e cila na shqetëson të gjithëve.
Të nderuar, duam t’ju njoftojmë se, ashtu si ju, edhe ne si Kryesi e klubit jemi të shqetësuar rreth asaj që ka ndodhur.

Duam t’ju sqarojmë se për pjesën e tribunës, KF Vëllazërimi nuk figuron aspak si palë në lidhje me nënshkrimin dhe realizimin e kontratës për këtë projekt. Sipas dokumentacionit të vendosur në tabelën informuese, investitor është Federata e Futbollit të Maqedonisë, ndërsa si realizues/kompani ndërtuese figuron ENERGOINVEST TREJD DOO Shkup. Projekti është mbikëqyrur nga Urban Stil Inxhiniering Shkup me fillim të datës 24.08.2024!

Prandaj, KF Vëllazërimi nuk ka qenë palë kontraktuese, vendimmarrëse apo përgjegjëse për realizimin e këtij projekti.
Me plot vetëdije dhe përgjegjësi, ne qëndrojmë prapa çdo iniciative që ndërmerret për t’u rindërtuar tribuna dhe për t’i kthyer stadiumit atë pjesë që për të gjithë ne ka një vlerë të veçantë. Asgjë më pak dhe asgjë më shumë – edhe ne kërkojmë me plot përgjegjësi që ajo të sanohet dhe të ndërtohet përsëri, sepse tribuna na ngjall shumë kujtime dhe momente të bukura.

Kryesia e KF Vëllazërimit prej vitesh mundohet me çdo kusht të sigurojë kushte dhe mjete financiare për ta mbajtur gjallë klubin, duke siguruar pagesa simbolike për lojtarët, trajnerët dhe ekonomin e stadiumit.

Edhe pse me shumë vështirësi, ne kemi arritur çdo vit t’u dalim përballë këtyre sfidave dhe t’i dalim borxhit çdokujt. Këtë e kemi arritur, para së gjithash, falë ndihmës suaj – tifozëve, afaristëve, Komunës dhe MËRGIMTARËVE tanë të respektuar, të cilët gjithmonë kanë qenë pranë klubit.

Për të gjitha përpjekjet tona janë dëshmi 9 gjenerata të fëmijëve, mbi 120 të rinj, si dhe djemtë tanë të ekipit të parë, të cilët në çdo betejë na bëjnë krenarë.
Për këtë japim llogaridhënie dhe do të qëndrojmë deri në frymën e fundit për t’i dalë zot KF Vëllazërimit.
Me respekt,
KRYESIA E KF VËLLAZËRIMIT

/tvgurra