Cilat janë qytetet më të shtrenjta në Evropë për të blerë një apartament?

Cyrihu dhe Gjeneva kryesojnë listën e qyteteve më të shtrenjta evropiane për blerjen e një apartamenti, ndërsa Londra renditet e treta. Sipas raportit “Mapping the World’s Prices 2026”, në Cyrih çmimi mesatar arrin në 22,910 euro për metër katror, kurse në Gjenevë në 19,439 euro. Një apartament prej 80 m² kushton rreth 1.83 milionë euro në Cyrih dhe 1.56 milionë euro në Gjenevë.

Londra renditet e treta me 17,241 euro/m², e ndjekur nga Parisi me 12,771 euro dhe Vjena me 12,483 euro. Mynihu është qyteti më i shtrenjtë në Gjermani, me 11,435 euro/m².
Në dhjetëshen e parë përfshihen gjithashtu Luksemburgu, Kopenhaga, Stokholmi dhe Oslo. Ndërkohë, Praga është më e shtrenjtë se Madridi dhe Berlini.

Stambolli është qyteti më i lirë ndër 28 qytetet evropiane të analizuara, me 2,646 euro/m², i ndjekur nga Athina me 3,442 euro. Mesatarja për qytetet evropiane është 9,090 euro/m², ose rreth 727 mijë euro për një apartament prej 80 m². Në nivel botëror, Hong Kongu kryeson me 23,790 euro/m², përpara Cyrihut dhe Seulit.

/albinfo