Nis përsëri lufta ! Irani sulmon objektiva amerikane në Jordani ?

Irani ka lëshuar raketa drejt objektivave në Jordani, përfshirë bazën ajrore Muwaffaq Salti, ku janë të dislokuara forca amerikane. Sulmi vjen pas një periudhe disa-javore me përplasje të kufizuara direkte mes Teheranit dhe Uashingtonit.

Sipas burimeve arabe, gjatë natës mes të dielës dhe të hënës, 31 gusht, disa raketa u drejtuan edhe në zonën e Akabës. Raportimet lokale flasin për disa shpërthime në pjesë të ndryshme të Jordanisë.

Një zyrtar amerikan, cituar nga Fox News, tha se deri tani nuk janë raportuar dëme të konsiderueshme dhe se pothuajse të gjitha raketat e lëshuara drejt objektivave amerikane janë interceptuar.

Edhe ushtria jordaneze deklaroi se ka rrëzuar tetë raketa që kishin hyrë në hapësirën ajrore të vendit.
Sulmi iranian dyshohet se ishte një përgjigje ndaj një operacioni amerikan në ishullin Larak, ku, sipas Teheranit, u goditën dy lëshues raketash të Gardës Revolucionare Islamike të Iranit (IRGC).

Komanda Qendrore e SHBA-së (CENTCOM) e ka mohuar pretendimin iranian se operacioni në ishull ishte “një akt agresioni”.
“Ky pretendim është absolutisht i rremë”, deklaroi CENTCOM në një postim në rrjetin X, duke shtuar se forcat amerikane kishin ndërmarrë “veprime të kufizuara dhe të sakta” kundër mjeteve të IRGC-së që, sipas SHBA-së, përbënin një kërcënim të menjëhershëm në Ngushticën e Hormuzit.

Disa orë më vonë, Marina e IRGC-së deklaroi se një supertanker që, sipas saj, kishte shkelur rregulloret, mori flakë pasi goditi dy mina detare.
Ndërkohë, IRGC ka marrë përgjegjësinë edhe për një sulm ndaj Emirateve të Bashkuara Arabe.

Sipas deklaratës së saj, forcat iraniane shënjestruan me dhjetëra dronë sulmues zonat e bazës ajrore Al Minhad, ku ndodhen helikopterë dhe trupa amerikane.
Zhvillimet shënojnë një përshkallëzim të ri të tensioneve mes Iranit dhe Shteteve të Bashkuara, ndërsa përplasjet ushtarake po shtrihen edhe në territorin e vendeve të tjera të rajonit.

/tch