Bilall Kasami: Më në fund nisëm punimet !
“Historike!” Me këtë mesazh, lideri i VLEN-it dhe kryetari i Komunës së Tetovës, Bilall Kasami, ka bërë të ditur nisjen e punimeve për 10 kilometrat e autostradës Shkup–Bllacë, një projekt strategjik që synon të përmirësojë lidhjen rrugore mes Maqedonisë së Veriut dhe Kosovës.
Përmes një statusi të publikuar në rrjetet sociale, Kasami ka theksuar rëndësinë strategjike dhe ekonomike të projektit, duke e cilësuar atë si një hap të rëndësishëm drejt forcimit të lidhjeve me Kosovën.
“Më në fund vendosëm gurthemelin dhe filluam punimet për 10 kilometrat e autostradës Shkup-Bllacë”, ka shkruar Kasami.
Sipas tij, ky projekt do të ketë rëndësi të veçantë ekonomike për vendin, ndërsa realizimin e tij e ka lidhur drejtpërdrejt me angazhimin e VLEN-it dhe Qeverisë.
“Ky projekt strategjik që na lidh dhe afron me Kosovën, me rëndësi të veçantë ekonomike, po jetësohet falë vizionit dhe përkushtimit të VLEN-it dhe të Qeverisë!”, deklaron Kasami.
Në fund të mesazhit të tij, lideri i VLEN-it ka përgëzuar qytetarët për nisjen e projektit, duke e cilësuar këtë moment si një të arritur që duhet të kremtohet.
“I përgëzoj të gjithë qytetarët. Ta gëzojmë!”, përfundon Kasami.
Autostrada Shkup–Bllacë konsiderohet një projekt me rëndësi të madhe infrastrukturore, veçanërisht për përmirësimin e lidhjes me Kosovën dhe forcimin e qarkullimit ekonomik e tregtar ndërmjet dy vendeve.
/zyrtare
