Autostrada Kërçovë–Ohër po shkatërron një pjesë të lumit Treska !
Aktivitetet ndërtimore për autostradën Kërçovë–Ohër po shkaktojnë tharjen e burimeve të lumit Treska, paralajmërojnë aktivistët ekologjikë, duke e vlerësuar situatën si shkatërrim serioz të mjedisit, transmeton Portalb.mk.
Sipas informacioneve të tyre, gërmimet intensive, hapja e tuneleve dhe ndërtimi i urave kanë rezultuar me dëmtimin e të gjitha burimeve nëntokësore dhe degëve që e furnizojnë lumin. Për këtë arsye, edhe burimi kryesor i Treskës në fshatin Vrutok, i cili më parë kishte një prurje jashtëzakonisht të madhe uji, sot po zhduket gradualisht.
Aktivistët ekologjikë theksojnë se natyra dhe biodiversiteti i këtij rajoni janë nën kërcënim të madh. Për këtë arsye, ata kërkojnë nga institucionet kompetente shtetërore që urgjentisht të formojnë komision ekspertësh, i cili do ta vlerësojë dëmin dhe do të hartojë plan për rehabilitimin teknik dhe rikthimin e burimeve të rrezikuara.
Siç transmeton TV24, ministri i Transportit dhe Lidhjeve, Aleksandar Nikolloski, ndërkaq, siguron se gjatë ndërtimit të autostradës Kërçovë–Ohër respektohen plotësisht të gjitha rregulloret dhe standardet mjedisore.
Pavarësisht garancive të ministrisë se gjithçka po zhvillohet në përputhje me rregulloret mjedisore, alarmi i ngritur nga aktivistët rikujton se ndërtimi i projekteve kapitale nuk duhet të bëhet në dëm të pasurive natyrore.
Në shkurt të këtij viti, u njoftua se autostrada Kërçovë-Ohër do të përfundojë me një shumë të re prej 186 milionë eurosh dhe një afat deri në qershor të vitit të ardhshëm. Në mars, drejtori i NPRRSh-së, Koce Trajanovski, nënshkroi aneks të ri, të tetë, të marrëveshjes midis NPRRSh-së dhe Sinohodron kineze, ndërsa paratë janë të destinuara posaçërisht për stabilizimin e rrëshqitjeve të dheut duke ndërtuar 14 galeri. Këto fonde, sipas njoftimit të sotëm, duket se janë siguruar në formën e kredive nga bankat vendase. Autostrada është e gjatë 57 kilometra, nga të cilat deri më tani janë hapur rreth 40 kilometra.
Autostrada ka qenë në ndërtim e sipër për më shumë se 12 vjet, dhe projekti u nis nga ish-kryeministri Nikolla Gruevski, i cili tani është i dënuar me burg dhe gëzon azil në Hungari. Rasti i financimit të autostradës përmes një kredie nga Banka kineze Eksim ishte një nga rastet e Prokurorisë Speciale Publike, i quajtur “Trajektorja”. Ndër të pandehurit, përveç Gruevskit, ishin ish-zëvendëskryeministri Vlladimir Peshevski, ish-ministri i Transportit dhe Lidhjeve Mile Janakieski, si dhe ish-drejtori i NPRRSh-së, Ljupço Georgievski. Akuzat kundër tyre në këtë rast u vjetërsuan pas ndryshimeve në Kodin Penal të miratuara nga qeveria e mëparshme, e udhëhequr nga Lidhja Socialdemokrate e Maqedonisë (LSDM) dhe Bashkimi Demokratik për Integrim (BDI). Akuzat ishin se në këtë rast buxheti i shtetit ishte dëmtuar me 155 milionë euro. Më parë, për vite me radhë, çështja ishte zvarritur nëpër labirintet gjyqësore.
/portalb
