Si e goditi thatësira shkatërruese e verës Zvicrën ?

Thatësira e madhe që ka përfshirë Zvicrën që nga qershori po shkakton pasoja serioze në të gjithë vendin. Temperaturat ekstreme, që arritën deri në 39°C në Bazel, dhe mungesa e reshjeve kanë ulur ndjeshëm nivelet e lumenjve, liqeneve dhe rezervuarëve.

Sipas raportit të qeverisë të publikuar më 24 gusht, bujqësia është ndër sektorët më të prekur. Shumë ferma kanë vështirësi me ujitjen, ndërsa në zonat alpine lopët po zbriten më herët në lugina për shkak të mungesës së ujit dhe ushqimit. Disa fermerë kanë nisur të përdorin rezervat e dimrit.

Niveli i ulët i Rinit ka kufizuar edhe transportin e mallrave drejt Zvicrës, pasi anijet nuk mund të ngarkohen normalisht. Nxehtësia e lumit Aar ka detyruar gjithashtu reaktorët në Beznau të ulin përkohësisht prodhimin, megjithëse furnizimi me energji nuk është cenuar.

Thatësira po dëmton tokën, pyjet dhe pemët, ndërsa rreziku i zjarreve mbetet i lartë. Prodhimi i sallatave, domateve, karotave, patateve dhe rrushit është prekur, duke ngritur shqetësime për mungesa dhe rritje çmimesh.

Qeveria paralajmëron se periudhat e nxehta dhe të thata mund të bëhen më të shpeshta për shkak të ndryshimeve klimatike. Me zvogëlimin e borës dhe akullnajave, Zvicra pritet të bëhet gjithnjë e më e varur nga reshjet.

/albinfo