Ambasadorja e Amerikës viziton Kërçovën

Sot, Komuna e Kërçovës pati nderin të mirëpresë Shkëlqesinë e Saj, Ambasadoren në Detyrë të Shteteve të Bashkuara të Amerikës në Maqedoni, znj. Nicole Varnes.

Gjatë takimit u diskutuan disa çështje me rëndësi për zhvillimin e mëtejshëm të Kërçovës, me theks të veçantë në zhvillimin ekonomik lokal, krijimin e kushteve më të mira për jetesën e qytetarëve, si dhe mundësitë për thellimin e bashkëpunimit dhe realizimin e iniciativave me interes të përbashkët.

Takimi ishte gjithashtu një mundësi për shkëmbimin e mendimeve lidhur me sfidat aktuale me të cilat përballet vetëqeverisja lokale, por edhe për prezantimin e potencialeve që ka Kërçova dhe mundësive për shfrytëzimin e tyre më të mirë në interes të komunitetit lokal.

Komuna e Kërçovës e vlerëson lart mbështetjen dhe partneritetin me Shtetet e Bashkuara të Amerikës dhe mbetet e hapur për bashkëpunim që kontribuon në zhvillimin ekonomik, modernizimin, krijimin e mundësive të reja dhe përmirësimin e cilësisë së jetës për të gjithë qytetarët.

Shprehim mirënjohjen tonë të sinqertë për znj. Varnes për vizitën, bisedën konstruktive dhe miqësore, si dhe për interesimin e treguar ndaj perspektivave zhvillimore të komunës sonë.

Vazhdojmë me përkushtim të ndërtojmë ura të reja bashkëpunimi dhe partneritete që sjellin përfitime konkrete për Kërçovën dhe qytetarët e saj.

/ms