Moti ekstrem godet Italinë dhe Gjermaninë, rrufe, përmbytje dhe tornado !

Moti i paqëndrueshëm ka shkaktuar probleme të shumta në disa pjesë të Italisë dhe Gjermanisë, me reshje të dendura, mijëra shkarkime rrufesh, përmbytje dhe tornado. Në Itali, situata më problematike është paraqitur në Liguria, ndërsa alarmi është ngritur edhe në pjesë të Toskanës. Në Gjermani, stuhitë kanë shkaktuar pasoja më të rënda, duke lënë një person të vdekur, të plagosur dhe duke shkaktuar dëme të konsiderueshme materiale.

Në Liguria janë regjistruar rreth 40 mijë rrufe, prej të cilave mbi 20 mijë vetëm në zonën e Gjenovës.

Një prej rrufeve goditi trenin Frecciabianca 8601, i cili po udhëtonte nga Gjenova drejt Romës. Për shkak të dëmtimit teknik, treni u ndal në zonën e Tigullios. Pasagjerët më pas u transferuan në një tren tjetër për të vijuar udhëtimin.

Probleme pati edhe në aeroportin e Gjenovës, ku disa fluturime u vonuan për shkak të kushteve të vështira atmosferike. Një avion që ishte nisur nga Bukureshti u detyrua të devijonte drejt Pizës.

Reshjet më intensive u regjistruan në Chiavari, në provincën e Gjenovës. Brenda një ore ranë rreth 103 milimetra shi, ndërsa në zonat malore sasia e reshjeve kaloi 60 milimetra.

Uji i grumbulluar shkaktoi përmbytje dhe solli mbylljen e disa nënkalimeve. Ekipet e Mbrojtjes Civile vazhdojnë monitorimin e situatës, ndërsa deri tani nuk janë raportuar emergjenca të mëdha.

Parashikimet meteorologjike tregojnë se përmirësimi i motit mund të jetë vetëm i përkohshëm. Pas një zbutjeje të mundshme gjatë së enjtes, kushtet pritet të përkeqësohen sërish të premten, me reshje të forta dhe stuhi përgjatë zonave bregdetare.

Edhe pjesët qendrore dhe veriore të Toskanës pritet të përballen me mot të paqëndrueshëm. Autoritetet rajonale kanë vendosur alarm portokalli për stuhi të forta nga ora 22:00 e së enjtes, 20 gusht, deri në orën 18:00 të së premtes, 21 gusht.

Në pjesën tjetër të Toskanës është aktivizuar alarmi i verdhë për të premten. Presidenti i rajonit, Eugenio Giani, njoftoi masat përmes rrjeteve sociale, duke paralajmëruar gjithashtu rrezik për përmbytje përgjatë rrjetit kryesor lumor në Toskanën qendrore.

Gjermani: tornado dhe një viktimë
Pasojat kanë qenë edhe më serioze në Gjermani, ku stuhi të fuqishme dhe dy tornado kanë goditur disa lande.
Në Walldorf, në Rheinland-Pfalz, një grua 58-vjeçare humbi jetën pasi një pemë e rrëzuar nga erërat e forta ra mbi strehën ku ishte futur bashkë me një grua tjetër për t’u mbrojtur nga stuhia. Gruaja tjetër, 47-vjeçare, pësoi lëndime të rënda dhe u dërgua në spital.

Stuhitë shkaktuan dëme të shumta edhe në pjesë të tjera të Rheinland-Pfalz, ku pemë u shkulën nga rrënjët dhe disa ndërtesa u dëmtuan.

Një tornado goditi zonën e Fürstenwalde-Spree, në Brandenburg, pranë Berlinit. Shërbimi Meteorologjik Gjerman (DWD) e konfirmoi fenomenin. Përveç dëmeve në automjete dhe objekte nga pemët e rrëzuara, nuk pati raportime për persona të lënduar.

Një tjetër tornado u regjistrua pranë Wetzlarit, në Hessen. Sipas autoriteteve të zjarrfikësve, rreth 60 shtëpi pësuan dëmtime.

Në Laubach, një pemë e rrëzuar goditi një rezervuar gazi pranë një ndërtese banimi. Për shkak të rrjedhjes së gazit, zona përreth u evakuua në një rreze prej rreth 200 metrash.

Dëme janë raportuar edhe në Turingi dhe Bavari, ku disa banesa janë dëmtuar në atë masë sa nuk mund të përdoren për momentin.

Shërbimi Meteorologjik Gjerman paralajmëron se moti i keq mund të vazhdojë edhe në orët në vijim, veçanërisht në Baden-Württemberg dhe Bavari, ku priten stuhi të tjera të fuqishme.

/ts