Radhë të gjata në “Tabanoc”! Mërgimtarë presin për të paguar gjobat e “Safe City” ? (VIDEO)

Pika kufitare “Tabanoc” sot sërish po përballet me kolona të gjata, pritje disaorëshe dhe tensione, pasi sistemi “Safe City” nisi të zbatohet edhe për automjetet me targa të huaja, përcjell TV21. Në dalje nga vendi, disa drejtuesve të automjeteve iu dorëzuan urdhërpagesa për kundërvajtje të trafikut të evidentuara më herët. Kjo shkaktoi pritje të gjata dhe shtim të kaosit në pikën kufitare.

“Radhë të gjata pritjeje këtu në vendkalimin kufitar të Tabanocës, ku shtetasit e huaj, të cilët kanë qëndruar apo kanë kaluar nëpër vendin tonë dhe janë kapur nga kamerat e Safe City-t, tani po presin me orë të tëra për të paguar kundërvajtjet në trafik”, raporton Adnan Qaili, gazetar i TV21.

Nga Ministria e Punëve të Brendshme dje sqaruan se kaosi është pasojë e ditës së parë të zbatimit të mekanizmit të ri, i cili përfshin edhe kundërvajtjet e regjistruara më parë.

Sipas MPB-së, drejtuesve tek të cilët sistemi ka evidentuar kundërvajtje u lëshohet procesverbal me urdhërpagesë për kundërvajtje. Qëllimi, sipas autoriteteve, është sanksionimi i barabartë dhe pa përjashtim i automjeteve vendore dhe të huaja. Autoritetet paralajmërojnë masa për përshpejtimin e procedurave në pikat kufitare, ndërsa kontrolli pritet të zgjerohet gradualisht edhe në pikat e tjera kufitare të vendit.

Kjo situatë u zhvendos edhe në rrjetet sociale dhe grupet e turistëve, ku pati përplasje mes turistëve serbë dhe shtetasve të Maqedonisë. Disa udhëtarë serbë u ankuan për organizimin dhe paralajmëruan se në të ardhmen do të udhëtojnë përmes Bullgarisë, ndërsa nga pala maqedonase u përgjigjën se rregullat vlejnë për të gjithë dhe se gjobat për tejkalim të shpejtësisë duhet të paguhen.

VIDEO:

/tv21