Safe City filloi zbatimi i sistemit edhe për automjetet e huaja në PKK Tabanoc

Nga sot ka filluar zbatimi i mekanizmit të vendosur për trajtimin e drejtuesve të automjeteve me targa të huaja, te të cilat sistemi „Qytet i Sigurt“ ka evidentuar kryerje të kundërvajtjes rrugore në territorin e Maqedonisë.

Në Pikën e Kalimit Kufitar Tabanoc, gjatë daljes nga shteti, shfaqen automjetet te të cilat sistemi i ka evidentuar më herët kundërvajtjet rrugore. Drejtuesit njoftohen se është evidentuar kundërvajtje dhe u lëshohet Procesverbal për kundërvajtjen rrugore së bashku me urdhërpagesën për kundërvajtje, me mundësi që gjobën ta paguajnë në përputhje me procedurën ligjore.

Numri më i madh i automjeteve që shfaqen sot në pikën kufitare është për shkak se kjo është dita e parë e zbatimit të këtij mekanizmi, ku përfshihen edhe kundërvajtjet e evidentuara më herët. Ministria e Punëve të Brendshme po ndërmerr aktivitete për zhvillimin e papenguar të procedurës dhe për zvogëlimin e kohës së pritjes së udhëtarëve.

Me vendosjen e këtij mekanizmi sigurohet qasje e barabartë dhe jodiskriminuese në sanksionimin e kundërvajtjeve rrugore, pavarësisht nëse bëhet fjalë për automjete me targa vendore apo të huaja.

„Qytet i Sigurt“ paraqet një instrument të rëndësishëm për përmirësimin e sigurisë në rrugë dhe rritjen e përgjegjësisë te të gjithë pjesëmarrësve në të. Ministria e Punëve të Brendshme vazhdon me zbatimin e sistemit, me qëllim që përdorimi i tij gradualisht të zgjerohet edhe në pikat e tjera kufitare të vendit

/ts