Frangu forcohet ndaj euros ?

Frangu zviceran po vazhdon të ruajë një pozitë të fortë përballë euros. Aktualisht, 1 euro këmbehet me rreth 0.94 frang, duke treguar forcën e monedhës zvicerane në raport me atë evropiane. Kjo zhvillim është veçanërisht i rëndësishëm për qytetarët dhe bizneset që kryejnë transaksione mes eurozonës dhe Zvicrës, pasi një euro sot vlen më pak se një frang në tregun valutor.

Euroja bie nën 93 lekë në Shqipëri
Dobësimi i euros po vërehet edhe në Shqipëri, ku monedha evropiane ka zbritur për herë të parë nën nivelin e 93 lekëve.
Sipas kursit zyrtar të Bankës së Shqipërisë, një euro është këmbyer me 92.96 lekë, 0.11 lekë më pak se një ditë më parë.

Vetëm gjatë muajit gusht, euroja është zhvlerësuar me 0.57 lekë, ndërsa krahasuar me fillimin e vitit, ajo këmbehet me rreth 3.8 lekë më pak, që përbën një rënie prej afërsisht 4 për qind.

Sipas aktorëve të tregut valutor, një prej faktorëve kryesorë të kësaj rënieje janë prurjet e valutës gjatë sezonit turistik. Shqipëria priti mbi 12 milionë vizitorë ndërkombëtarë në vitin 2025, duke rritur ofertën e valutës në treg.

Në krahasim me kulmin prej rreth 140 lekësh në vitin 2011, euroja sot këmbehet rreth 47.4 lekë më pak, ose rreth 34 për qind më poshtë.
Banka e Shqipërisë ka ndërhyrë në treg duke blerë euro, në përpjekje për të zbutur rënien e monedhës evropiane. Sipas të dhënave të raportuara nga “Monitor”, nga fillimi i vitit 2024 deri në fund të tremujorit të parë të vitit 2026, banka qendrore ka tërhequr nga tregu rreth 2.2 miliardë euro.

Euroja nën presion edhe ndaj dollarit
Në raport me dollarin amerikan, 1 euro këmbehet me rreth 1.15 dollarë.
Lëvizja e kursit tregon se edhe përballë dollarit euroja vazhdon të jetë nën presion, ndonëse kursi i këmbimit ndërmjet dy monedhave ndikohet vazhdimisht nga zhvillimet në ekonominë globale dhe tregjet financiare.

Dobësimi i euros në raport me frangun, lekun dhe lëvizjet e saj ndaj dollarit po e bëjnë kursin e monedhës evropiane një prej temave të rëndësishme të tregjeve valutore gjatë kësaj periudhe.

/albinfo