Kërçovë: Jeta e hallës Qamile, mes traditës dhe vetmisë (VIDEO)

Këtë zonjë i gjithë Prapadishti i Kërçovës e njeh si halla Qamile. Ajo është lindur dhe është rritur në këtë shtëpi.Jeton e vetme që kur prindërit i ndërruan jetë 26 vjet më parë. Një ditë të zakonshme e kalon duke bërë punët e përditshme.

“Ja kam larë teshat me dorë, nuk kam maqinë, përgatis ushqim, fshijë unë nuk jam e shpejtë ikën koha”, deklaroi Qamile Eshtrefi. Halla Qamile është ndër të vetmet të moshuara që vishet me veshje tradicionale, siç janë veshur të moshuarat para 30 viteve nëpër fshatrat e Kërçovës.

“I mbajë unë nuk kam veshur fustan asnjëherë, më parë janë veshur me të gjata por unë pasi jam plakur vishem me dimija”, tha Qamile Eshtrefi.
Në këtë fshat jetojnë vetëm tre familje. Të tjerët janë shpërngulur, sepse jeta këtu nuk është e lehtë. Nuk ka as shitore e as transport për në qytet.

Ujë për pije dhe për të larë Qamilja e shfrytëzon nga bunari që e ka në oborr.
Para kamerës së TV21 zbuloi se asnjëherë në 77 vitet e jetës së saj nuk ka pirë barna, ndërsa në mjek për herë të parë ka qenë vitin e kaluar.

“Asnjëherë nuk kam pirë ilaçe, vitin e kaluar kam qenë në mjek kur m’u bllokua kurrizi, doktori me tha kjo nuk ka asgjë se më incizoi në televizor, të gjithë më dolën mirë, as yndyrë as sheqer, zemra mirë, bubrekët mirë, vetëm tha problem me muskujt se kam punuar shumë, u lodha se unë çava një traktor me dru”, u shpreh Qamile Eshtrefi.

Ajo çdo vit mbjellë domate, groshë, kastravecë, speca, misër e kunguj, ndërkaq bukën e gatuan vetë. E kur i duhen gjëra nga qyteti, ia blen djali i motrës, i cili i gjendjet afër sa herë që ka nevojë.

Me kaq halla Qamile mjaftohet, madje thotë se është e kënaqur sa më s’ka.
“Asgjë, vetëm shëndet të kem i lutem Zotit të me jap shëndet të mos sëmurem për në shtrat, dashtë Zoti prej ne këmbë në varr”, tha Qamile Eshtrefi.

VIDEO:

/tv21