Vetëm 126 mijë euro dëmshpërblim Ziadin Selës për përgjakjen e 27 prillit !

Gjykata e Apelit në Shkup ka nxjerrë një aktgjykim të formës së prerë, duke pranuar pjesërisht ankesën e politikanit Ziadin Sela lidhur me dëmshpërblimin për ngjarjet e dhunshme të 27 prillit 2017 në Kuvend. Me këtë vendim, gjykata ka rritur vlerën financiare që Republika e Maqedonisë së Veriut detyrohet t’i paguajë atij për dëmin jomaterial të pësuar.

Por, ky dëmshpërblim është vlerësuar si skandaloz, pasi që Ziadin Sela në padinë e tij kishte kërkuar gjithsej 61 milionë denarë apo rreth 1 milion euro si kompensim për dëmin e pësuar, përcjell INA.

Sipas vendimit të ri, shteti obligohet t’i paguajë Selës një dëmshpërblim total prej 7.8 milionë denarësh (afërsisht 126,830 euro) për shkeljen e të drejtave personale, si dhe për dëmtimin e rëndë të shëndetit fizik dhe psikik.

Siç raportohet, linja argumentuese e Gjykatës së Apelit mbetet pothuajse identike me atë të shkallës së parë, mirëpo trupi gjykues ka konstatuar se shuma e caktuar fillimisht nga Gjykata Civile ishte e pamjaftueshme.

Në arsyetimin ligjor specifikohet se gjykata e shkallës së parë nuk e kishte vlerësuar në shkallën e duhur seriozitetin e dëmit të shkaktuar dhe nuk kishte marrë parasysh të gjitha rrethanat relevante që ndikojnë në përcaktimin e një kompensimi të drejtë dhe objektiv.

Nga shuma totale, Apeli ka caktuar:
1.500.000 denarë për dhimbjet fizike;
900.000 denarë për frikën e përjetuar;
3.000.000 denarë për dhimbjet shpirtërore për shkak të zvogëlimit të aftësisë së përgjithshme jetësore;
600.000 denarë për dhimbjet shpirtërore nga shpërfytyrimi;
600.000 denarë për cenimin e dinjitetit personal;
600.000 denarë për cenimin e nderit;
600.000 denarë për cenimin e reputacionit.

Gjykata e Apelit e hodhi poshtë si të pabazuar ankesën e Avokaturës së Shtetit, e cila kishte kërkuar shfuqizimin e aktgjykimit dhe rigjykimin e lëndës.

/(INA)