Apel për ndihmë humanitare

Të nderuar bashkëvendës, të nderuar qytetarë të Kërçovës,
Ju drejtohemi me një thirrje humanitare për të ndihmuar bashkëvendësin tonë, Ekrem Xheloja, i cili po përballet me një sëmundje të rëndë dhe ka nevojë për mbështetjen tonë.

Prej gati tre muajsh, Ekremi po trajtohet në spitalet e Shkupit, duke kaluar një periudhë shumë të vështirë si për shëndetin ashtu edhe për familjen e tij. Kostot e trajtimit dhe të shërimit janë tepër të larta dhe dita-ditës po rriten. Duke qenë se Ekremi është i vetëpunësuar në sektorin privat dhe për shkak të gjendjes së tij shëndetësore nuk është më në gjendje të punojë, barra financiare është bërë edhe më e rëndë.

Ne, si fond dhe si bashkëvendës nuk mund të rrimë duarkryq përballë kësaj situate. Prandaj, ju bëjmë thirrje të gjithëve që, sipas mundësive tuaja, të kontribuoni dhe t’i gjendeni pranë në këto momente të vështira. Çdo ndihmë, sado e vogël, është e vlefshme. Le të tregojmë edhe një herë solidaritetin, humanizmin dhe zemërgjerësinë që gjithmonë e kanë karakterizuar popullin tonë. Sot Ekremi ka nevojë për ne.

Zoti e shpërbleftë secilin prej jush për ndihmën dhe mbështetjen tuaj!
Fondi Besa – Drogomisht i Madh

/ms