Gjermania e zvogëlon kuotën për punëtorët nga Ballkani Perëndimor !

Koalicioni qeveritar gjerman ka konfirmuar synimin për ta kufizuar të ashtuquajturën Rregullore për Ballkanin Perëndimor. Deri më tani, kjo rregullore u mundësonte punëtorëve nga vendet e Ballkanit Perëndimor që nuk janë anëtare të Bashkimit Evropian të shkonin më lehtë për të punuar në Gjermani.

Ky hap, i paralajmëruar edhe në marrëveshjen e koalicionit, arsyetohet me “kohë të rritjes së papunësisë”. Logjika e dukshme pas tij është: të ulet numri i punëtorëve të huaj, që ata të mos ua marrin vendet e punës gjermanëve. Megjithatë, deri tani nuk ka prova se kjo po ndodh vërtet.

Rregullorja për Ballkanin Perëndimor deri tani u mundësonte 50.000 personave në vit nga Shqipëria, Bosnja dhe Hercegovina, Kosova, Mali i Zi, Maqedonia e Veriut dhe Serbia të shkonin në Gjermani për punë. Tani ky kufi maksimal, nga fillimi i vitit 2027, pritet të ulet në 25.000 persona në vit.

Nuk ka ndryshime në kushtet e tjera: të interesuarit edhe më tej do të duhet vetëm të kenë një ofertë pune, pa kërkesa shtesë lidhur me llojin e profesionit apo kualifikimet.

Për emigrantët nga shtete të tjera jashtë BE-së, përveç ofertës së punës kërkohet edhe kualifikim i njohur ose përvojë relevante pune. Në vitet e fundit, përmes të ashtuquajturës “Kartë e Mundësive” dhe me plotësimin e kushteve të caktuara, si njohja e gjuhës, është bërë e mundur edhe ardhja pa pasur paraprakisht një vend pune të siguruar.

Rregullorja për Ballkanin Perëndimor u vendos në vitin 2016 si përgjigje ndaj numrit të madh të qytetarëve nga Ballkani që paraqisnin kërkesa azili në Gjermani me pak shanse suksesi, duke krijuar ngarkesë shtesë për institucionet.

Në të njëjtën kohë, gjashtë vendet e Ballkanit Perëndimor u shpallën të ashtuquajtura vende të sigurta të origjinës. Kjo bëri të mundur që kërkesat për azil nga shtetasit e tyre të refuzoheshin më lehtë dhe më shpejt.

Që atëherë, numri i kërkesave për azil nga rajoni ka rënë ndjeshëm, ndërsa më shumë se njëqind mijë njerëz nga Ballkani Perëndimor janë shpërngulur në Gjermani si fuqi punëtore. Për këtë arsye, ekspertët e konsiderojnë këtë masë si një sukses të rëndësishëm.

Mbështetje për fondet sociale gjermane
Edhe pse një pjesë e kompanive gjermane kohët e fundit kanë larguar nga puna dhjetëra mijëra punëtorë, shumë sektorë vazhdojnë të përballen me mungesë serioze të kuadrit të kualifikuar.

Një studim i Fondacionit “Bertelsmann”, i prezantuar të enjten, tregon se një pjesë e problemit mund të lehtësohej nëse migrantët do të integroheshin më mirë në tregun e punës.
Hulumtimi tregon se rreth një e treta e të ardhurve me arsim të mirë punojnë në pozita për të cilat janë të mbikualifikuar ose që nuk përputhen me arsimin e tyre.

Në profesionet ndihmëse dhe në sektorë si pastrimi i objekteve, punëtorët e huaj vazhdojnë të jenë të përfaqësuar dukshëm mbi mesataren.

Studimi konfirmon sërish se punëtorët e ardhur, përmes kontributeve të tyre, mbështesin sistemet gjermane të mbrojtjes sociale – diçka që edhe vetë qeveria gjermane e përmend si një nga qëllimet kryesore të reformave të saj të mëdha.

Sipas autorëve, efekti pozitiv mund të rritej edhe më shumë nëse migrantët e kualifikuar do të njiheshin më mirë profesionalisht dhe do të punësoheshin në fushat për të cilat janë të trajnuar.

/dw