Mungesa e terminëve, arsye më e shpeshtë për korrupsionin e mjekëve!

Punonjësit shëndetësorë janë të vetëdijshëm se korrupsioni ekziston në radhët e tyre dhe madje 84 për qind e tyre konsiderojnë se ai është pjesërisht ose shumë i përhapur.

Megjithatë, vetëm 14 për qind pranojnë se kanë qenë personalisht të përfshirë ose kanë qenë dëshmitarë të veprimeve korruptive në institucionin ku punojnë. Nga pacientët më së shpeshti kërkohen para, por ekzistojnë edhe forma të tjera më të fshehta të korrupsionit, me të cilat ata përballen gjithnjë e më shpesh.

“Nuk bëhet fjalë vetëm për ryshfet në formën e parave, që është forma më e përhapur dhe më e njohur në publik. Punonjësit shëndetësorë njohin edhe forma më të fshehta të korrupsionit, si dërgimi i pacientëve nga terminet e rregullta të mbuluara nga Fondi në termine private, të cilat ata duhet t’i paguajnë vetë, rekomandimi i barnave të caktuara, laboratorëve privatë, institucioneve private diagnostikuese e kështu me radhë, gjë që u sjell përfitime financiare punonjësve shëndetësorë”, tha Borjan Pavlovski – koordinator në ESE.

Si arsye më e shpeshtë për korrupsionin përmendet mungesa e termineve, megjithëse në opinion ekziston bindja se vetë mjekët krijojnë artificialisht mungesë të termineve, në mënyrë që të përfitojnë më lehtë financiarisht.

Ajo që është veçanërisht befasuese është fakti se edhe vetë punonjësit shëndetësorë korruptojnë njëri-tjetrin. Ryshfeti përdoret për avancim në karrierë, për dërgim në specializime, udhëtime ose për përfitime të tjera me interes.

“Praktikisht nuk ka asnjë çështje në funksionimin e një institucioni shëndetësor që të mos mund të kushtëzohet në një mënyrë ose në një tjetër, apo mbi të cilën të mos mund të ushtrohet ndikim përmes keqpërdorimit të pushtetit. Punonjësit shëndetësorë thanë se puna e tyre e përditshme, organizimi i ndërrimeve, mënyra e punës, ngarkesat e punës, zhvillimi profesional dhe avancimi normal në karrierë janë çështje të prekura nga keqpërdorimi i pushtetit dhe korrupsioni”, tha Jasminka Frishçiq – drejtore ekzekutive e ESE.

Hulumtimi është realizuar me 410 punonjës shëndetësorë, ndër të cilët edhe 21 drejtorë ose drejtues të institucioneve publike shëndetësore nga fusha e mbrojtjes gjinekologjike-obstetrike.

/tv21