Mickoski: Po zhvillohet një ndërtim historik paralelisht në 6 autostrada

Kryetari i Qeverisë, Hristijan Mickoski, në një intervistë për Radio Televizionin e Maqedonisë me rastin e 2 viteve të mandatit, tha se në këtë moment po zhvillohet një ndërtim historik paralelisht në 6 autostrada në Maqedoni.

“Unë jam i lumtur që mund të them se më në fund e mbyllëm financiarisht segmentin Kërçovë–Ohër, falë një sindikati të krijuar nga bankat vendase, pasi, kushtimisht thënë, huadhënësit kinezë na lanë në baltë. Financiarisht, për këtë vit e mbyllëm po ashtu, falë bankave vendase, projektin e Korridorit 8 dhe Korridorit 10-D. Tani po kërkojmë në tregun ndërkombëtar, javën e ardhshme, të martën, NPRRSH do të kërkojë nga huadhënës të jashtëm një shumë kornizë deri në përfundimin e projektit, me çka do t’i sigurojmë mjetet deri në fund.

Qeveria e kaluar jo vetëm që nuk kishte lëvizur asgjë nga ai projekt, por thjesht nuk e kishte mbyllur as financiarisht atë projekt. Kjo është edhe më tragjike. Do të thotë, ata nuk kishin bërë asgjë as me shpronësimet, por nuk kishin as financa për projektin. Dhe tani, kur më akuzojnë se nuk paska para për këtë apo atë projekt, unë pyes: çfarë bëtë ju? Kështu që, atë projekt e mbyllëm.

Është mirë që më në fund, pas nuk e di sa peripecive, për Bllacë–Shkup kemi kontratë dhe më në fund, pas shumë vitesh, atë do ta ndërtojë një kompani maqedonase. Fitoi tenderin nga bankat evropiane kompania maqedonase “Granit”. Është mirë sepse, në fund të ditës, ajo marrëveshje financiare ka grant, por ka edhe kredi, të cilën e paguajnë taksapaguesit maqedonas. Kur punon një kompani maqedonase, më vjen veçanërisht mirë, sepse e di se kjo është e mirë për ekonominë maqedonase.

Jemi afër përfundimit me Bukojçan–Kërçovë. Kjo është praktikisht lidhja ndërmjet projektit të “Sinohydro” dhe “Bechtel & Enka”. Procedura ka përfunduar dhe presim që edhe ajo autostradë të fillojë. Kështu që, praktikisht, në një moment do të kemi 5 deri në 6 segmente. Do ta kemi segmentin Tetovë–Gostivar, Gostivar–Bukojçan, do ta kemi segmentin Bukojçan–Kërçovë, lidhjen ndërmjet autostradës së “Sinohydro” dhe “Bechtel & Enka”, do të përfundojë autostrada Kërçovë–Ohër, faza fillestare Bllacë–Shkup, ndërsa në fazë të avancuar do të jetë Prilep–Manastir. Pres që në gjysmën e parë të vitit të ardhshëm të kemi rreth dhjetë kilometra të lëshuara në përdorim në segmentin Prilep–Manastir. Kjo historikisht nuk është bërë në Maqedoni – të ndërtohen 6 segmente autostradash në të njëjtën kohë”, është decid Mickoski.

/ts