Vazhdojnë të bien çmimet e naftës

Çmimet e naftës vazhduan të bien të premten, ndërsa investitorët po ndjekin me kujdes zhvillimet në Lindjen e Mesme, por gjithnjë e më shumë po përqendrohen edhe te perspektivat e furnizimit të tregut global.

Nafta Brent, standardi ndërkombëtar për dërgesat e gushtit, ra me 2,03 për qind, duke zbritur në 73,73 dollarë për fuçi, ndërsa nafta amerikane WTI u ul me 2,11 për qind dhe po tregtohet me 70,4 dollarë për fuçi.

Tregjet reaguan me përmbajtje, pavarësisht informacioneve të reja se Irani qëndron pas një sulmi ndaj një anijeje mallrash me flamur të Singaporit, pranë brigjeve të Omanit. Shërbimi britanik për sigurinë detare njoftoi se nga incidenti nuk ka pasur viktima dhe as dëme mjedisore.

Sekretari i Përgjithshëm i Organizatës Ndërkombëtare Detare deklaroi se zbatimi i planit për evakuimin e një pjese të anijeve është pezulluar përkohësisht, me qëllim që të konfirmohet sërish se janë siguruar garancitë e nevojshme të sigurisë për lundrimet në rajon.

Tensionet mes Iranit dhe Shteteve të Bashkuara janë rritur edhe më tej për shkak të mosmarrëveshjeve rreth përdorimit të fondeve të përfshira në një memorandum mirëkuptimi. Kryetari i Parlamentit iranian hodhi poshtë pretendimet e administratës së Donald Trumpit se fondet e zhbllokuara iraniane do të përdoren për blerjen e produkteve bujqësore amerikane.

/ts