ALARM nga ish-kryeministri Georgievski ?

Ish-kryeministri i vendit dhe një nga themeluesit e VMRO-DPMNE-së, Ljubço Georgievski, ka lëshuar akuza të rënda dhe të drejtpërdrejta ndaj udhëheqësisë së rrymës aktuale të kësaj partie, pikërisht në ditën e përvjetorit të themelimit të saj.

Përmes një reagimi të ashpër, Georgievski ka kujtuar zanafillën e partisë në vitin 1990, duke bërë një krahasim dramatik mes qëllimeve fillestare dhe gjendjes politike ku sipas tij ndodhet sot kjo forcë politike.

“Na këtë ditë të vitit 1990, me një grup bashkëshortësh (të një mendjeje), themelova VMRO-DPMNE-në. Si qëllim kryesor vendosa një Maqedoni të pavarur jashtë kthetrave të Serbisë së Madhe! Sot, VMRO-DPMNE e ka shndërruar Maqedoninë në një vazal të botës serbe dhe në një serbizim të plotë të identitetit maqedonas,” ka deklaruar prerë Georgievski.

Georgievski, i cili ka shërbyer si kryetar i parë i VMRO-DPMNE-së dhe si kryeministër i vendit në periudhën 1998-2002, njihet për qëndrimet e tij kritike ndaj kursit politik që ndjek Shkupi zyrtar. Këto akuza vijnë në një moment delikat politik, duke goditur direkt narrativën identitare të partisë në pushtet.

Ky reagim pritet të ngjallë debate të nxehta në opinionin publik dhe brenda kampit politik maqedonas, duke rihapur diskutimet e hershme mbi ndikimet gjeopolitike në rajon dhe kursin strategjik të shtetit.

/(INA)