Humbi jetën 37-vjeçari shqiptar në Zvicër !

Siç ka shkruar platforma albinfo.ch, Blerim S., baba i tre fëmijëve dhe i njohur në komunitetin shqiptar, ka humbur jetën pasi automjeti i tij u përplas me një shtyllë ure në kantonin Aargau. Shkaqet e aksidentit mbeten ende të paqarta.

Detajet e reja tregojnë se ai humbi jetën të dielën në mbrëmje pasi automjeti që po drejtonte doli nga rruga dhe u përplas me një shtyllë ure në Birrfeldstrasse, pranë Wohlenschwilit në kantonin Aargau.

Sipas policisë, aksidenti ndodhi pak pas orës 18:30. Për arsye që ende nuk janë sqaruar, automjeti i tij Renault doli nga korsia dhe u përplas me forcë. Pavarësisht reagimit të shpejtë të ekipeve të emergjencës, 37-vjeçari ndërroi jetë në vendin e ngjarjes, transmeton albinfo.ch.

Blerimi jetonte në rajonin e Wohlenit, ishte i martuar dhe baba i tre fëmijëve. Ai punonte në një kompani të njohur të industrisë së orëve dhe njihej si një tifoz i pasionuar i futbollit, duke qenë i angazhuar edhe në një klub futbollistik lokal.

Familjarë, miq dhe bashkëpunëtorë kanë shprehur dhimbjen e thellë për humbjen e tij. Një mike e familjes tha për mediat zvicerane se lajmi ka tronditur të gjithë rrethin e tij shoqëror.

“Është jashtëzakonisht tragjike që ai nuk është më mes nesh. Ai lë pas bashkëshorten dhe tre fëmijët”, është shprehur ajo.

Dhimbja është e madhe edhe në komunitetin shqiptar, ku Blerimi njihej gjerësisht. Sipas të afërmve, babai i tij kishte qenë një figurë e njohur për angazhimin e tij në çështjen e çlirimit të Kosovës.

Në vendin e aksidentit janë vendosur lule dhe mesazhe ngushëllimi, ndërsa shumë persona kanë shprehur pikëllimin e tyre edhe në rrjetet sociale.
Autoritetet e kantonit Aargau kanë nisur hetimet për të zbardhur rrethanat e aksidentit. Deri tani nuk dihet nëse në ngjarje kanë ndikuar probleme shëndetësore, shpejtësia apo faktorë të tjerë.

/Albinfo.ch