Ndahet nga jeta Lulije Dalipi. Deputetja Valbona Adili Emini shpreh ngushllime

Më 10 qershor, pas një aksidenti tragjik rrugor në Shtetet e Bashkuara të Amerikës, humbëm shoqen tonë të klasës, Lulije Dalipi.
Ajo ishte më shumë se një shoqe e bankave të shkollës, ajo ishte një shpirt i lirë, një zë i veçantë dhe një njeri që dinte të lërë kujtime që nuk fshihen kurrë.

Sot, ndërsa dhimbja e largimit të saj është ende e freskët, kujtojmë buzëqeshjen, energjinë dhe sinqeritetin që e shoqëronin kudo. Lulija nuk ishte kurrë e zakonshme. Ajo kishte një energji të rrallë, një shpirt të lirë, pak rebele, pak revolucionare, por gjithmonë e sinqertë dhe e vërtetë.

Ajo la pas vetes dy vajza që i donte pafundësisht. Dashuria, kujdesi dhe kujtimet që u la atyre do të mbeten përherë të gjalla.
Në një nga mesazhet e saj të fundit, shkruante se do të vinte në vendlindje në korrik, se kishte plane, angazhime dhe shpresonte të takohej me njerëz që nuk i kishte parë prej kohësh. Askush nuk mund ta mendonte se ato fjalë do të mbeteshin një amanet i heshtur dhe një kujtim që sot na prek zemrën.

Lamtumirë, Lulije.
Do të mbetesh përgjithmonë pjesë e klasës sonë, e rinisë sonë dhe e kujtimeve më të bukura që ndajmë bashkë. Zoti të mëshiroftë dhe të dhëntë paqen e amshuar.

/ms