“Omer Kaleshi” e vendos Kërçovën në hartën ndërkombëtare të artit ?

Kërçova aktuale

Kërçova do të jetë nikoqire e Kolonisë së Parë Ndërkombëtare të Artit “Omer Kaleshi”, e cila do të mbahet nga 14 deri më 19 qershor 2026, duke mbledhur artistë nga Maqedonia e Veriut, Shqipëria, Kosova dhe Serbia, shkruan Portalb.mk.

Organizatorja Lulzime “Lulu” Osmani për Portalb.mk tha se kjo koloni ka rëndësi të veçantë për qytetin dhe për ruajtjen e trashëgimisë artistike të Omer Kaleshit.

“Për mua, organizimi i Kolonisë së Parë Ndërkombëtare të Artit ‘Omer Kaleshi’ në Kërçovë është një nder i veçantë, por edhe një përgjegjësi e madhe. Kjo koloni nuk është vetëm një ngjarje artistike, por një urë që lidh vendlindjen e artistit të madh me botën e artit bashkëkohor. Omer Kaleshi ishte një figurë me rëndësi ndërkombëtare, i cili përmes veprës së tij e bëri të njohur emrin e Kërçovës në shumë qendra artistike evropiane.

Përmes kësaj kolonie, synojmë të nderojmë trashëgiminë e tij artistike, të krijojmë hapësirë për dialog kulturor dhe të sjellim artistë nga vende të ndryshme që, për disa ditë, do ta shndërrojnë Kërçovën në një qendër të krijimtarisë dhe shkëmbimit artistik. Për mua personalisht, është një ëndërr e realizuar që qyteti ynë të ketë një aktivitet të tillë ndërkombëtar, i cili jo vetëm ruan kujtimin e Omer Kaleshit, por krijon edhe mundësi të reja për artin dhe kulturën në të ardhmen”, tha Osmani.

Ajo theksoi se pritshmëritë janë që kjo koloni të bëhet traditë e qëndrueshme kulturore dhe ta vendosë Kërçovën në hartën e ngjarjeve të rëndësishme artistike.

“Pritshmëritë e mia janë që kjo koloni të shndërrohet në një traditë të qëndrueshme kulturore, e cila do ta vendosë Kërçovën në hartën e ngjarjeve të rëndësishme artistike në rajon dhe më gjerë. Synimi ynë nuk është vetëm organizimi i një aktiviteti të suksesshëm, por krijimi i një platforme që do të lidhë artistë, institucione kulturore dhe dashamirës të artit nga vende të ndryshme.

Besoj se ndikimi i saj do të jetë i shumëfishtë. Së pari, do të pasurojë jetën kulturore të qytetit duke sjellë ide të reja, ekspozita dhe krijime artistike që do të mbeten si dëshmi e këtij takimi ndërkombëtar. Së dyti, do të promovojë Kërçovën si një qytet që vlerëson artin, kulturën dhe dialogun mes popujve. Gjithashtu, shpresoj që kjo koloni të frymëzojë brezat e rinj, duke u treguar se arti mund të jetë një urë komunikimi dhe një mënyrë për të prezantuar identitetin tonë kulturor në botë.

Nëse arrijmë që përmes kësaj kolonie të krijojmë lidhje të reja artistike, të ruajmë kujtimin e Omer Kaleshit dhe të zgjojmë interes më të madh për kulturën në qytetin tonë, atëherë do të konsideroj se kemi arritur një nga qëllimet më të rëndësishme të këtij projekti”, deklaroi ajo.

Në këtë koloni do të marrin pjesë artistë vendorë dhe ndërkombëtarë, ndërsa aktiviteti do të përmbyllet me ekspozitën e veprave të realizuara gjatë ditëve të kolonisë.

FOTO: