Valbona Adili Emini: Sqarim për hapjen e zyrave parlamentar

Të nderuar qytetarë,
Duke marrë shkas nga disa diskutime të fundit në opinion lidhur me hapjen e zyrave parlamentare dhe kontaktin e drejtpërdrejtë të deputetëve me qytetarët, ndiej obligim t’ju informoj për angazhimin tim konkret në këtë drejtim.

Si deputete e zgjedhur nga Zona e 5-të Zgjedhore, që nga muaji i parë kur pranova mandatin e deputetes kam paraqitur kërkesë zyrtare përmes Kuvendit të Republikës së Maqedonisë së Veriut për sigurimin e një hapësire pune në komunat që gravitojnë në Zonën e 5-të Zgjedhore. Qëllimi im ka qenë dhe mbetet i njëjtë: të jem sa më pranë qytetarëve dhe të krijohen kushte që së paku një herë në muaj të zhvilloj takime të drejtpërdrejta me banorët e këtyre komunave.

Gjatë kësaj periudhe janë zhvilluar edhe zgjedhjet lokale të vitit 2025, një proces që ka ndikuar në ngadalësimin e procedurave administrative dhe institucionale, përfshirë edhe realizimin e kërkesës për sigurimin e hapësirave zyrtare për deputetët nëpër komuna.

Duke pasur parasysh se Zona Zgjedhore 5 është një zonë e gjerë që përfshin disa qytete dhe komuna, kam arritur marrëveshje gojore me dy kryetarët e komunave të udhëhequra nga VLEN-i, përkatësisht me kryetarin e Komunës së Dollnenit dhe kryetarin e Komunës së Dibrës, për të siguruar hapësira ku mund të zhvilloj takime me qytetarët.
Megjithatë, kjo nuk e ka zbehur në asnjë moment përkushtimin tim për ta çuar përpara këtë nismë.

Këtë e konsideroj detyrim moral, etik, njerëzor dhe politik ndaj çdo qytetari që më ka besuar votën e tij. Përfaqësimi nuk duhet të kufizohet vetëm në ditën e zgjedhjeve; ai duhet të jetë i vazhdueshëm gjatë gjithë mandatit, përmes komunikimit, dëgjimit të shqetësimeve, kërkesave dhe propozimeve të qytetarëve. Si deputete për herë të parë dhe mandatin e kam pranuar një vit më vonë, kam punuar dhe do të vazhdoj të punoj me përkushtim të plotë për të justifikuar besimin e qytetarëve dhe për të qenë zëri i tyre në Kuvend.

Mbetem e hapur për çdo qytetar, organizatë, iniciativë apo grup interesi që dëshiron të kontribuojë me ide, sugjerime apo kërkesa për përmirësimin e jetës në komunat e Zonës së 5-të Zgjedhore.
Faleminderit për besimin dhe mbështetjen tuaj.
Me respekt,
Valbona Adili Emini
Deputete në Kuvendin e Republikës së Maqedonisë së Veriut