Incident në ajër: Defekti teknik detyron avionin e përfaqësueses maqedonase të bëjë ulje emergjente në Stamboll ?
Avioni që transportonte kombëtaren maqedonase të futbollit u detyrua sot të ndërpresë përkohësisht rrugën drejt Shkupit dhe menjëherë pas ngritjes të kthehej urgjentisht prapa në aeroportin ndërkombëtar të Stambollit, njoftoi 4news.
Sipas të dhënave zyrtare të radarëve nga shërbimi Flightradar24, bëhet fjalë për fluturimin me numër FH1949, i operuar me një avion të tipit Airbus A320-214 me regjistrim TC-FHK, në pronësi të kompanisë ajrore “Freebird Airlines”. Fluturimi me të cilin ekspedita maqedonase duhej të mbërrinte në Aeroportin Ndërkombëtar të Shkupit (SKP) filloi në orën 10:10 UTC (respektivisht në orën 12:10 sipas kohës lokale në Maqedoni).
Rreth njëzet minuta pas ngritjes nga aeroporti i Stambollit, piloti i mjetit fluturues ka vënë re një defekt. Ai ka kërkuar menjëherë kthim urgjent prapa, gjë që i është aprovuar me shpejtësi nga kontrolli i fluturimit.
Analiza e detajuar e rrugës dhe grafiku i shpejtësisë e lartësisë konfirmojnë këtë procedurë të jashtëzakonshme në ajër. Avioni u ngrit rreth orës 10:16 UTC dhe filloi të ngjitej, duke arritur një lartësi maksimale prej rreth 8.000 këmbësh (rreth 2.400 metra) në orën 10:21 UTC.
Në vend që të vazhdonte kursin e planifikuar drejt Maqedonisë, ekuipazhi bëri menjëherë një kthesë të fortë drejt perëndimit dhe veri-perëndimit mbi Detin Marmara dhe rajonin e Silivrisë, duke përshkruar një “rreth” në ajër me qëllim që ta drejtonte mjetin fluturues në mënyrë të sigurt drejt pistës. Grafiku konfirmon se avioni u uyl me sukses dhe në mënyrë të sigurt në pistën e Stambollit në orën 10:47 UTC (12:47 sipas kohës në Maqedoni).
Shkak për kthimin e detyruar të avionit është një problem i vogël teknik. Siguria e futbollistëve të kombëtares maqedonase dhe e pasagjerëve të tjerë në asnjë moment nuk ka qenë e cenuar apo e rrezikuar. Falë gjakftohtësisë dhe reagimit të shpejtë të pilotit, avioni është ulur shëndoshë e mirë dhe për momentin ndodhet i parkuars në aeroportin e Stambollit.
Pritet që të përcaktohet më tej se kur ekspedita maqedonase do ta vazhdojë rrugën e saj drejt shtëpisë.
Kjo dramë e papritur në qiell vjen vetëm një ditë pas zhvillimit të ndeshjes miqësore mes kombëtareve të Turqisë dhe Maqedonisë në Stamboll. Futbollistët tanë luajtën dje edhe një ndeshje tjetër kontrolluese në kuadër të përgatitjeve, ndërsa pas përfundimit të obligimeve, sot duhej të ktheheshin në Shkup me këtë fluturim çarter, përpara se rruga e tyre të ndërpritej përkohësisht nga kjo situatë e jashtëzakonshme.
/ts
