Saranda Imeri Stafai i përgjigjet Ali Ahmetit! E vështirë qenka opozita?

Deputetja e VLEN-it, Saranda Imeri Stafai, ka reaguar pas deklaratave të kreut të BDI-së, Ali Ahmeti, i cili nga kuvendi i degës së partisë në Studeniçan iu drejtua kryeministrit në detyrë të Kosovës, Albin Kurti, lidhur me debatin për statusin e gjuhës shqipe në Maqedoninë e Veriut, përcjell tetova1

Ahmeti i cilësoi shqetësuese deklaratat e Kurtit dhe theksoi se për çështje të ndjeshme kombëtare “nuk bëhet majtap”, duke nënvizuar se Marrëveshja e Ohrit mbetet themeli i të drejtave të shqiptarëve në vend.

Pas kësaj, Imeri Stafai ka reaguar përmes një postimi në facebook ku ironizon qëndrimet e liderit të BDI-së, Ali Ahmeti dhe numëron një sërë çështjesh për të cilat, sipas Imerit BDI-ja ka bërë kompromise gjatë viteve në pushtet.

Postimi i plotë i Saranda Imeri Stafait:
“Albin, unë e lash këtë, e lash atë…
Ama, dorën në zemër, mbeta jashtë qeverisë se u pajtova me më pak. Mora Soravinë, mora biznesin me mazutin, mora e mora…

Lash gjuhën shqipe në Gjykatën Kushtetuese. Lash institucionet pa kuadro shqiptare, ndërsa shumë bashkëpunëtorë të rinj që nuk i donte Gruevski mbetën në shtëpi me vite. Lash provime në gjuhën maqedonase e jo në shqip. Ministrat e mi takoheshin me kriminelë lufte në Beograd, e ftonin Lavrovin në Shkup, rrinin duarkryq kur rriheshin nxënës shqiptarë, kur vriteshin komandantë dhe kur montoheshin raste kundër shqiptarëve…

Besomë, lista është e gjatë se çfarë lash e çfarë mora.
E vështirë qenka opozita, o Albin.
#patetik”, ka përfunduar deputetja Imeri Stafai.

/tetova1.mk