Kujtim Kasami: Të korrigjohet padrejtësia ndaj kulturës shqiptare në Kërçovë

Fjalimi I plotë i këshilltarit
Në pikën e parë të rendit të ditës kërkoj të diskutohet mënyra e shpërndarjes së mjeteve për projektet kulturore në Komunën e Kërçovës.
Kërçova mban titullin “Qytet i Kulturës 2026”, prandaj shpërndarja e mjeteve publike duhet të reflektojë diversitetin kulturor, traditat dhe vlerat e të gjitha komuniteteve.

Megjithatë, vlerësoj se mjetet financiare nuk janë shpërndarë në mënyrë të drejtë dhe të balancuar. Nga rreth 10 milionë denarë të ndarë për kulturën, vetëm rreth 16% janë ndarë për projektet dhe manifestimet shqiptare, ndërsa rreth 1% për komunitetin rom. Kjo krijon një pabarazi të theksuar në mbështetjen e aktiviteteve kulturore dhe ngre pikëpyetje serioze mbi kriteret e përzgjedhjes.

Po ashtu, asnjë festival apo manifestim i rëndësishëm kulturor shqiptar nuk është trajtuar në mënyrë të barabartë, ndërsa në shumë raste janë financuar individë dhe projekte të caktuara përmes intervenimeve, e jo mbi bazën e vlerave kulturore, traditës dhe ndikimit që kanë në komunitet.

Si shembull, për shënimin e 7 Marsit – Ditës së Mësuesit, janë ndarë vetëm 20.000 denarë, një shumë simbolike dhe e pamjaftueshme për një datë me rëndësi të veçantë kombëtare, arsimore dhe kulturore për shqiptarët.

Kërkoj përgjigje të qartë se përse nuk janë financuar projektet dhe manifestimet që për vite me radhë kanë mbajtur gjallë jetën kulturore në Kërçovë:
• Festivali “Alba Policet”, i cili për tre vite me radhë është financuar nga Ministria e Kulturës, por këtë vit nuk ka përfituar mbështetje.

• Manifestimi “Dasma Kërçovare”, i cili prej më shumë se 10 vitesh promovon traditën, veshjet, zakonet dhe kulturën autentike të Kërçovës.
• “Uskana Fest”, festival teatrosh që për pesë vite është mbështetur nga Komuna dhe Ministria e Kulturës.
• Manifestimi letrar “Mbretëresha Thana”, i organizuar për më shumë se 20 vite, ku marrin pjesë poetë dhe krijues nga mbarë trojet shqiptare dhe Ballkani.

• “Çmimet Votra”, një manifestim që organizohet 10 vite me rradhë tradicional që nderon personalitetet dhe sukseset e vitit, i konsideruar nga shumë qytetarë si një lloj “Oscari i Kërçovës”.

Gjithashtu propozoj që, para miratimit përfundimtar të projekteve kulturore, të gjitha aplikimet dhe vlerësimet e komisioneve profesionale t’i dorëzohen për shqyrtim Komisionit për Kulturë të Këshillit Komunal, i cili më pas të japë mendimin dhe rekomandimin e tij.

Njëkohësisht, kërkoj nga Komisioni për Kulturë dhe nga Kryetari i Komunës që të shqyrtojnë mundësinë që këto projekte të financohen sipas vlerës reale dhe shumave të kërkuara për realizimin e tyre,me 1 miljon denar per keto 5 projekte duke marrë parasysh rëndësinë, traditën dhe kontributin që japin në jetën kulturore të qytetit, në mënyrë që të zbutet sadopak padrejtësia që u është bërë kulturës shqiptare dhe shoqatave kulturore që prej vitesh mbajnë gjallë aktivitetin artistik dhe kulturor në Kërçovë.

E njëjta procedurë duhet të zbatohet edhe për projektet sportive. Si kryetar i Komisionit për Sport, do të angazhohem që të garantohet transparencë, llogaridhënie dhe trajtim i barabartë për të gjithë aplikuesit, në mënyrë që të mos përsëriten pakënaqësitë dhe padrejtësitë që janë evidentuar në fushën e kulturës.
Kultura nuk duhet të jetë çështje privilegjesh apo intervenimesh, por çështje vlerash, tradite, identiteti dhe interesi publik.

/tvgurra