“Donald Trump” shpëton nga therja për Kurban Bajram

Nga një blerje për therje rituale, bualli albino me “balluket bionde” u kthye në fenomen viral dhe përfundoi i mbrojtur nga shteti në kopshtin zoologjik të Dakës

Një buall i rrallë albino në Bangladesh, i quajtur “Donald Trump” për shkak të tufës së verdhë të qimeve në kokë, është shpëtuar në momentin e fundit nga therja për Kurban Bajram, pas ndërhyrjes së Qeverisë.

Kafsha, që peshon afro 700 kilogramë, ishte shitur tashmë për therje rituale, por autoritetet vendosën ta ndalonin procesin për arsye sigurie, pasi bualli u kthye në fenomen viral në media sociale.

Video të kafshës u përhapën me shpejtësi në internet, duke tërhequr turma vizitorësh nga zona të ndryshme të vendit vetëm për të parë buallin me “balluket bionde” dhe sjelljen e tij të qetë.

Sipas Ministrisë së Brendshme në Bangladesh, ministri Salahuddin Ahmed urdhëroi që blerësi të rimbursohej dhe kafsha të transferohej në kopshtin zoologjik kombëtar në Daka.

Ajo që nisi si një blerje e zakonshme për festën e Kurban Bajramit, përfundoi duke e kthyer “Donald Trump”-in në një nga kafshët më të famshme të momentit në Bangladesh.

/ts