LSDM: Pse po zvarritet ekstradimi i Nikola Gruevskit?
Lidhja Social Demokrate e Maqedonisë (LSDM) ka kërkuar përgjegjësi nga kryeministri Hristijan Mickoski dhe ministri i Drejtësisë Igor Fillkov, duke i akuzuar se po zvarrisin procedurat për ekstradimin e ish-kryeministrit Nikola Gruevski nga Hungaria.
Sipas LSDM-së opozitare, institucionet kompetente ende nuk kanë dorëzuar dokumentacionin e nevojshëm në Hungari për realizimin e procedurës së ekstradimit të Gruevskit, i cili prej vitesh ndodhet në azil politik në këtë shtet.
Nga partia e drejtuar nga Venko Filipçe thonë se pushteti aktual nuk e dëshiron kthimin e Gruevskit në vend, pasi sipas tyre kjo do të rrezikonte pozitën politike të Mickoskit brenda partisë së tij.
“Bëhet fjalë për mbrojtje të vetëdijshme dhe të qëllimshme të Nikola Gruevskit”, theksojnë nga LSDM, duke shtuar se ish-kryeministri mbetet simbol i, siç thonë ata, “krimit, korrupsionit dhe shtetit të robëruar”.
Partia opozitare kërkon transparencë nga institucionet dhe përgjigje konkrete se përse ende nuk janë ndërmarrë të gjitha hapat ligjorë për ekstradimin e Gruevskit, i cili kërkohet nga drejtësia maqedonase në disa raste gjyqësore.
/ts
