Policia zvicerane arreston 67-vjeçarin nga Kosova! Ja pse ?

Policia e Kantonit të Cyrihut ka arrestuar një 67-vjeçar nga Kosova, i dyshuar për përfshirje në një rast tentim mashtrimi telefonik ndaj një qytetareje të moshuar zvicerane, transmeton albinfo.ch.

Referuar deklaratave zyrtare nga autoritetet zvicerane, ngjarja ka ndodhur të mërkurën e kaluar rreth mesditës, kur një 68-vjeçare ka pranuar një telefonatë nga një person që është prezantuar rrejshëm si prokurore e shtetit.

Në telefonatë, mashtruesja e dyshuar ka pretenduar se vajza e viktimës kishte shkaktuar një aksident rrugor dhe se, për të shmangur arrestimin e saj, ishte e nevojshme pagesa urgjente e një garancie prej disa dhjetëra mijëra frangash.

E moshuara nuk ka rënë pre e skemës dhe ka njoftuar menjëherë policinë përmes numrit të emergjencës, duke sinjalizuar dyshimet për mashtrim.

Falë reagimit të shpejtë të saj dhe ndërhyrjes së autoriteteve, policia ka arritur ta lokalizojë dhe ta arrestojë 67-vjeçarin nga Kosova përpara shtëpisë së viktimës, ku ai dyshohet se kishte shkuar për të marrë paratë.

Pas arrestimit dhe marrjes në pyetje, i dyshuari është dërguar në prokurori për procedura të mëtejshme ligjore, ndërsa hetimet për rastin po vazhdojnë.

/Albinfo.ch