Kërçovë: Këshilltarët Shqipëtar paralajmërojnë kërkesa për përfaqësim të barabartë në institucionet komunale

Këshilltari i koalicionit AKI, Ilir Rushani, dhe Kujtim Kasami nga lista e pavarur në mbledhjen e sotme të Këshillit Komunal të Kërçovës, kërkuan tërheqjen nga rendi i ditës të pikave që kishin të bënin me propozimin për emërimin e udhëheqësit, si dhe të anëtarëve të Këshillit Drejtues dhe Këshillit Mbikëqyrës të ndërmarrjes publike “Kërçova Projekt”, ndërsa propozimi u pranua dhe pikat u tërhoqën nga rendi i ditës.

Ata paralajmëruan se në mbledhjen e ardhshme do të kërkojnë përfaqësim të barabartë të shqiptarëve në institucionet komunale, duke insistuar që drejtori i kësaj ndërmarrjeje të jetë shqiptar dhe që shqiptarët të përfaqësohen edhe në organet drejtuese të saj.

Sipas tyre, kjo kërkesë mbështetet në faktin se poste të rëndësishme në nivel lokal, përfshirë kryetarin, sekretarin, si dhe drejtues të institucioneve si “Komunaleci” dhe Njësia e Zjarrfikësve, aktualisht udhëhiqen nga kuadro të afërta me VMRO-DPMNE-në.

Po ashtu, këshilltarët shqiptarë kërkuan që Komisioni për Kulturë në mbledhjen e ardhshme të paraqesë raport dhe sqarime lidhur me ndarjen e mjeteve për shoqatat kulturore. Sipas pretendimeve të ngritura në seancë, rreth 80 për qind e mjeteve janë ndarë për shoqatat maqedonase, 16 për qind për shoqatat shqiptare dhe vetëm 1 për qind për komunitetin rom.

Ata vlerësuan se përfaqësimi i barabartë dhe shpërndarja e drejtë e resurseve publike duhet të jenë pjesë e vendimmarrjes komunale dhe se institucionet lokale duhet të reflektojnë strukturën reale multietnike të komunës.

/tvgurra