Dyshime për spiunazh në kabinetin e Siljanovskës !

Prokuroria për Ndjekjen Penale të Krimit të Organizuar dhe Korrupsionit ka zhvilluar për disa muaj një hetim paraprak lidhur me aktivitete të dyshuara të paligjshme në Kabinetin e Presidentes Gordana Siljanovska-Davkova, raportoi Sloboden Peçat.

Sipas informacioneve të publikuara, Prokuroria ka pranuar një kallëzim penal anonim nga një grup punonjësish të Ministrisë së Brendshme, në të cilin pretendohet se të dhëna konfidenciale janë kopjuar dhe koduar nga sistemi kompjuterik i Kabinetit të Presidentes. Dyshimet lidhen me mundësinë që këto të dhëna të kenë përfunduar në duart e shërbimeve të huaja të inteligjencës.

Nga Prokuroria konfirmuan për “Sloboden Peçat” se hetimi paraprak është hapur në dhjetor të vitit të kaluar, pas një njoftimi të dorëzuar nga Sektori për Krim Kibernetik pranë Ministrisë së Brendshme.

“Janë lëshuar urdhra për analizimin e pajisjeve kompjuterike, telefonave celularë dhe të dhënave elektronike, por ende nuk ka një raport përfundimtar”, njoftuan nga Prokuroria.

Sipas medias, dyshime shtesë janë ngritur edhe për shkak se pamjet nga kamerat e sigurisë në Zyrën e Presidentit ende nuk janë siguruar. Nga Ministria e Brendshme konfirmuan se pajisjet kompjuterike dhe telefonat celularë janë sekuestruar, ndërsa analiza e provave elektronike është në vazhdim.

/shenja