Urime: Hamdije Ademi Tafa nga Kërçova rizgjidhet zëvendëskryetare

Në Kuvendin e 71-të të Dhomës së Avokatëve në Maqedoninë e Veriut u mbajtën zgjedhjet për përbërjen e re të Bordit Drejtues në nivel republikan, ku u zgjodhën gjithsej 17 anëtarë.
Për kryetar të ri u zgjodh Laze Gjorgjievski nga Shkupi, ndërsa për zëvendëskryetare u rizgjodh Hamdije Ademi Tafa nga Kërçova, duke vazhduar mandatin e saj në një nga funksionet më të rëndësishme brenda këtij institucioni.

Rizgjedhja e saj për herë të dytë në këtë pozitë konsiderohet si vlerësim për profesionalizmin, përkushtimin dhe kontributin e saj të vazhdueshëm në fushën e avokatisë. Me angazhimin e saj ndër vite, Hamdije Ademi Tafa ka ndërtuar profil të respektuar në qarqet juridike dhe avokatore në nivel shtetëror.

Ajo mbetet njëkohësisht edhe përfaqësuesja e vetme shqiptare e zgjedhur në këtë organ të rëndësishëm republikan, duke përfaqësuar komunitetin shqiptar me profesionalizëm dhe dinjitet në strukturat udhëheqëse të Dhomës së Avokatëve.

Kjo rizgjedhje shihet si rezultat i besimit që kolegët avokatë kanë ndaj saj dhe si njohje për angazhimin e saj në mbrojtjen e vlerave profesionale, drejtësisë dhe përfaqësimit institucional.

Kuvendi i 71-të u vlerësua si një moment i rëndësishëm për forcimin dhe avancimin e mëtejshëm të rolit të avokatisë në Maqedoninë e Veriut.

/tvgrurra