VMRO me akuza ndaj Islam Abazit! Shpëtimtari i kriminelëve ?

Islam Abazi, si kryetar i Prokurorisë për Ndjekjen e Krimit të Organizuar dhe Korrupsionit, në vend që të ndjekë dhe luftojë krimin e organizuar dhe korrupsionin, ai është bërë xhelat i drejtësisë. Mbyllja e procedurës për rastin “Mazut”, për të cilin ekzistojnë dyshime të bazuara për një krim të rëndë prej 167 milionë eurosh, është skandal dhe dëshmi e aktivizimit të njerëzve të bindur të Ali Ahmetit, Zoran Zaevit dhe Venko Filipçes për mbrojtjen e kriminelëve nga LSDM-ja dhe BDI-ja.

Ndikimi i Zaevit, Filipçes dhe Ahmetit në sistemin gjyqësor është i madh, veçanërisht te individë si Abazi, dhe kjo shihet më qartë në raste si ky me mazutin dhe krimin prej 167 milionë eurosh, kur në vend që drejtësia të çohet deri në fund dhe rasti të hyjë në procedurë gjyqësore, ai mbyllet, thonë nga VMRO-DPMNE.

– Prokuroria që udhëhiqet nga fqinji i Ahmetit, vetëm para një viti kërkoi paraburgim për 4 persona të dyshuar në këtë rast, sepse konsideronte se të dyshuarit mund të arratiseshin ose të ndikonin mbi dëshmitarët në procedurë. Dhe tani papritur, pas një viti, prokurorët e së njëjtës prokurori nën komandën e Abazit vendosin se nuk ka pasur bazë dhe prova për të vazhduar procedura për këtë rast, megjithëse i gjithë opinioni publik pa se bëhet fjalë për krim të rëndë, pastrim parash dhe dyshime për ndotje të mjedisit.

Kjo kundërthënie nga ana e prokurorisë që drejtohet nga Abazi, kuadër i BDI-së i vendosur në kohën e LSDM-së, nuk mund të bazohet në argumente juridike apo prokuroriale, por vetëm në baza përfitimi dhe politike. Prandaj, së pari e ftojmë Bashkim Besimin nga Këshilli i Prokurorëve Publikë, i cili ndër të tjera është i afërm i ish-ministrit të financave nga radhët e BDI-së, Fatmir Besimi, të tregojë pse Këshilli i Prokurorëve Publikë duhet të qëndrojë anash kur është evidente se ka pasur ndikim nga ana e Islam Abazit në të ashtuquajturin rast “Mazut”.

Gjithashtu edhe prokurorja Katerina Kollareviq të tregojë si ka konstatuar se nuk ka asnjë dëm në rastin prej 167 milionë eurosh, kur i gjithë opinioni publik pa dhe dëgjoi për dëme financiare dhe ekologjike, kur edhe vetë ESM-ja paraqiti ankesë në instancat më të larta gjyqësore. Dhe në fund, kuadri i Ahmetit, Zaevit dhe Filipçes, Islam Abazi, të përgjigjet deri kur planifikon të shërbejë për këtë treshe kriminale dhe në vend që të jetë zbatues i drejtësisë, të jetë xhelat i drejtësisë.

Drejtësia maqedonase duhet të çlirohet nga figura si Islam Abazi, që në vend të tyre të vijnë profesionistë me kredibilitet moral dhe kapacitet intelektual, për të cilët zbatimi i drejtësisë është në vend të parë. Islam Abazi duhet të japë dorëheqje, që të mos ketë më vendime kontroverse që i lirojnë nga përgjegjësia penale kriminelët e LSDM-së dhe BDI-së dhe të fillojë të rikthehet besimi në gjyqësor, i cili tani është minimal, vetëm 2%, thonë nga partia.

/a1on.mk