Shqipëria mes vendeve me cilësinë më të keqe të ujit të pijshëm në Europë !
Shqipëria renditet ndër vendet me cilësinë më të dobët të ujit të pijshëm në Europë, sipas të dhënave të “Atlasit të Ujit” dhe Indeksit të Performancës Mjedisore. Me vetëm 54.1 pikë, vendi ynë pozicionohet në fund të listës evropiane, duke u lënë pas edhe nga vende si Moldavia dhe Gjeorgjia, të cilat gjithashtu shënojnë performancë të ulët, por më të qëndrueshme në disa indikatorë.
Megjithatë, të dhënat evropiane tregojnë një problem më të gjerë strukturor. Ujërat nëntokësore mbeten burim kryesor furnizimi në Bashkimin Europian, duke siguruar rreth 65% të ujit të pijshëm dhe 25% të ujit për bujqësinë. Por më shumë se 20% e tyre rezultojnë me status të dobët kimik, për shkak të ndotjes nga substanca si merkuri, kadmiumi dhe pesticidet
Sipas Komisionit Evropian, në 14% të stacioneve matëse në Europë është tejkaluar niveli maksimal i nitrateve, duke sinjalizuar presion të vazhdueshëm nga bujqësia intensive dhe menaxhimi i dobët i burimeve ujore.
Në Shqipëri, problemet me cilësinë e ujit nuk lidhen vetëm me burimet natyrore, por edhe me menaxhimin e sistemit. Investimet në ujësjellës-kanalizime shpesh janë shoqëruar me tendera me kosto të fryra dhe projekte të pjesshme që nuk japin rezultat të qëndrueshëm në terren.
Në shumë zona, rrjetet e vjetruara të shpërndarjes shkaktojnë humbje të mëdha teknike të ujit, ndërsa ndërhyrjet emergjente zëvendësojnë planifikimin afatgjatë. Kjo krijon një cikël të vazhdueshëm riparimesh, ku fondet publike shpërndahen pa sjellë përmirësim real të cilësisë së shërbimit.
Cilësia e ujit të pijshëm në Shqipëri mbetet kështu një kombinim i faktorëve: ndotje lokale, infrastrukturë e amortizuar dhe dobësi në menaxhimin institucional të sektorit të ujësjellësve.
Ndërsa Europa përparon drejt standardeve më të larta të monitorimit dhe mbrojtjes së ujërave nëntokësore, Shqipëria përballet ende me sfida bazike: nga filtrimi dhe trajtimi i ujit, deri te kontrolli i investimeve publike dhe transparenca e tenderëve.
/joq
