A e mban Mickovski peng VLENin për shkak të ministrit Fatmir Limani?
Asnjë gjurmë e shenjë nga rikonstruimi i paralajmëruar i qeverisë për në maj ose qershor. Tashmë në mes të muajit maj, kryeministri Hristijan Mickoski shkurt thotë se akoma nuk është duke zhvilluar negociata me partnerët e koalicionit për rikonstruimin.
Tani që u konsolidua në një parti, as nga VLEN nuk thonë se kur do t’i fillojnë negociatat me kryeministrin Mickoski rreth rikonstruimit. Nuk dihet madje me siguri as se cilat kuadro dhe pozita të VLEN-it mund t’i përfshijë rikonstruimi
“…në këtë fazë nuk ka vendime konkrete apo përfundimtare. Çdo diskutim do të zhvillohet në organet brenda partiake mbi bazën e prioriteteve programore, reformave dhe interesit të qytetarëve. Për VLEN-in, prioritet mbetet funksionaliteti i institucioneve, realizimi i projekteve dhe përmirësimi i cilësisë së shërbimeve për qytetarët”, thonë nga VLEN.
Nga VLEN më herët kanë deklaruar se nuk qëndrojnë më pas ministrit Fatmir Limani, dhe zv.kryeministrit Arben Fetai. Po ashtu flitet edhe për mundësinë e këmbimit të dikastërëve me partnerët e tjerë dhe në pikëpyetje është Ministria për Eurointegrime.
Nga partnerët e tjerë të koalicionit qeveritar, flitet edhe për mundësinë e ndryshimit të Ivan Stoillkoviq si ministër për Marrëdhënie mes Bashkësive, i cili është partner koalicioni i VMRO-DPMNE-së.
ZNAM tashmë ka një deputetët më pak në shumicën parlamentare gjë që flitet se i rrezikon pozitën e dy ministrave në qeveri, sidomos pas kritikave të opinionit ndaj ministrit Fillkov që lidhen me reformat në drejtësi. Por kreu i partisë Maksim Dimitrievski në intervistë për Sitel tha se është i kënaqur me punën e dy ministrave të tij.
“Është legjitime që Kryeministri të kërkojë ndryshime në emra të caktuar në Qeveri dhe në përbërjen e Qeverisë, por sigurisht që ne, si partnerë qeveritarë, kemi pjesën tonë në marrjen e vendimeve përfundimtare. Ne, si ZNAM, jemi absolutisht të kënaqur me punën e dy ministrave tanë, Goran Minçen në Ministrinë e Administratës Publike dhe Goran Fillkovit në Ministrinë e Drejtësisë.” thotë Maksim Dimitrievski, Kryetar i ZNAM-it. Për momentin kryeministri thotë se është duke vazhduar konsultimet brendapartiake për procesin që vijon.
/Alsat.mk
