Jan arrestuar 10 shoferë! Njëri nga Kërçova

Gjatë 24 orëve të fundit, në të gjithë territorin e shtetit, nëpunësit policorë kanë privuar nga liria 10 shoferë për drejtim të pakujdesshëm të automjeteve, prej të cilëve gjashtë kanë drejtuar pa patentë shoferi (tre të mitur), ndërsa nga dy kanë drejtuar me ndalim aktiv dhe nën ndikim të alkoolit.

Dy shoferë në Shkup (njëri i mitur), si dhe nga një në Tetovë (i mitur), Gostivar, Veles (i mitur) dhe Dellçevë kanë drejtuar automjet pa patentë shoferi. Shoferi në Dellçevë ka qenë i përfshirë edhe në aksident trafiku me automjetin që e drejtonte, pas çka është konstatuar se ishte nën ndikim të alkoolit, përkatësisht i janë matur 1,89 promilë alkool në gjak.

Nga një shofer në Shkup dhe në Kërçovë kanë drejtuar automjetin me ndalim aktiv, ndërsa nga një shofer në Shkup dhe Veles kanë drejtuar automjetin nën ndikim të alkoolit. Pas dokumentimit të plotë të rasteve do të parashtrohen kallëzime penale përkatëse.

U bëjmë apel të gjithë pjesëmarrësve në trafik që t’i respektojnë rregullat dhe rregulloret e trafikut, të mos drejtojnë automjet pa e dhënë provimin për patentë shoferi, ose nëse u është shqiptuar masa e ndalimit të drejtimit ose nëse janë nën ndikim të alkoolit, dhe të gjithë së bashku të kontribuojmë për një komunikacion më të sigurt.

/ms